પત્નીની સાથે રહી શકાશે નહીં, ટીમ સાથે જ પ્રવાસ કરવાનો, સામાનની પણ મર્યાદા નક્કી

ઓસ્ટ્રેલિયા પ્રવાસ પર ટીમ ઈન્ડિયાના ખરાબ પ્રદર્શન બાદ BCCIએ સમીક્ષા બેઠક યોજી હતી. આ દરમિયાન BCCIએ ઘણા મોટા અને કઠિન નિર્ણયો લીધા છે. હવે ખેલાડીઓની પત્નીઓ વિદેશ પ્રવાસમાં લાંબા સમય સુધી તેમની સાથે રહી શકશે નહીં. આ સિવાય પ્રવાસ અને ખેલાડીઓના સામાનના વજન અંગેના નિયમોમાં ફેરફાર કરવામાં આવશે.

જ્યારે ખેલાડીઓ તેમના પરિવાર સાથે હોય છે, ત્યારે તેઓ સ્વાભાવિક રીતે તેમની સાથે વધુ સમય વિતાવે છે. આવી સ્થિતિમાં તેમનું ધ્યાન ભટકાઈ શકે છે અને તેમની રમતમાં ઘટાડો થઈ શકે છે. આ મુદ્દાને ઉકેલવા માટે BCCIએ હવે નિર્ણય લીધો છે કે 45 દિવસથી વધુના વિદેશ પ્રવાસ પર ખેલાડીઓની પત્નીઓ તેમની સાથે વધુમાં વધુ 14 દિવસ જ રહી શકશે. જ્યારે આનાથી ઓછા સમયગાળાના પ્રવાસમાં ખેલાડીનો પરિવાર તેની સાથે માત્ર 7 દિવસ જ વિતાવી શકશે.

BCCIએ સમગ્ર ટીમ માટે એકસાથે પ્રવાસ કરવાનું પણ ફરજિયાત બનાવ્યું છે. ખેલાડીઓને હવે તેમના પોતાના વાહનમાં કે અન્ય કોઈપણ વાહનમાં મુસાફરી કરવાની મંજૂરી આપવામાં આવશે નહીં. તેઓએ ટીમ બસમાં જ મુસાફરી કરવાની રહેશે. ઓસ્ટ્રેલિયા પ્રવાસ દરમિયાન ખેલાડીઓ અલગ-અલગ ફરતા જોવા મળ્યા હતા.
BCCIની બેઠકમાં ખેલાડીઓના સામાનના વજનને લઈને પણ મોટું પગલું લેવામાં આવ્યું છે. જો કોઈપણ ખેલાડીના સામાનનું વજન 150 કિલોથી વધુ હશે, તો BCCI તેના માટે ચૂકવણી કરશે નહીં. તેના બદલે, આનાથી ઉપર જે પણ વધારાનું વજન હશે, તે ખેલાડીએ પોતે જ ચૂકવવું પડશે.

BCCIએ ટીમ ઈન્ડિયાના મુખ્ય કોચ ગૌતમ ગંભીરના મેનેજર સામે પણ કાર્યવાહી કરી છે. ટીમ ઈન્ડિયાના કોઈપણ મુખ્ય કોચે ક્યારેય ટીમના પ્રવાસમાં તેમના મેનેજરને તેમની સાથે રાખ્યા નથી. પરંતુ ગંભીરના મેનેજર ગૌરવ અરોરા ટીમ ઈન્ડિયાની મેચો દરમિયાન ગંભીર સાથે પ્રવાસ કરે છે. ગૌરવ પણ મેચ દરમિયાન સ્ટેડિયમમાં વીઆઈપી બોક્સમાં જોવા મળે છે. જો કે, હવે ગૌરવ ગંભીર સાથે મુસાફરી કરી શકશે નહીં અને તેની એન્ટ્રી વીઆઈપી બોક્સમાં થશે નહીં. આ નિયમો અન્ય કોચના મેનેજરને પણ લાગુ પડશે.

હવે જો ભારતીય ખેલાડીઓ સારું પ્રદર્શન નહીં કરે તો તેમને પગારમાં કાપનો સામનો કરવો પડી શકે છે. બેઠકમાં એવું સૂચન કરવામાં આવ્યું હતું કે આમ કરવાથી ખેલાડીઓ રમત પ્રત્યે વધુ જવાબદાર બનશે. જો ટીમ મેચ હારે છે તો તેની અસર ખેલાડીઓના ખિસ્સા પર પડી શકે છે.