સ્ટાર ફાસ્ટ બોલર જસપ્રીત બુમરાહ પણ નિવૃત્તિ લેશે ?

રવિચંદ્રન અશ્વિન, રોહિત શર્મા અને વિરાટ કોહલીની ટેસ્ટ નિવૃત્તિમાંથી ભારતીય ક્રિકેટ હજુ સુધી બહાર આવ્યું નથી. ક્રિકેટ ચાહકો આ દિગ્ગજોની નિવૃત્તિની જાહેરાતને પચાવવાનો પ્રયાસ કરી રહ્યા છે. હવે સ્ટાર ફાસ્ટ બોલર જસપ્રીત બુમરાહે એક વિસ્ફોટક નિવેદન આપીને ફેન્સના ધબકારા વધારી દીધા છે. ટીમ ઈન્ડિયા ઈંગ્લેન્ડ પ્રવાસ માટે રવાના થાય તે પહેલા બુમરાહે કંઈક એવું કહ્યું છે જેનાથી તેની નિવૃત્તિના સંકેતો મળી રહ્યા છે. બુમરાહે એક ઈન્ટરવ્યુમાં કહ્યું છે કે તેના માટે કારકિર્દી કરતા પરિવાર વધુ મહત્વપૂર્ણ છે.

ઓસ્ટ્રેલિયાના ભૂતપૂર્વ કેપ્ટન માઈકલ ક્લાર્ક સાથેની મુલાકાત દરમિયાન બુમરાહે વર્કલોડ, પરિવાર વગેરે જેવા ઘણા મુદ્દાઓ પર ચર્ચા કરી. આ દરમિયાન તેણે એ પણ સ્પષ્ટ કર્યું કે પરિવાર કારકિર્દી કરતા વધુ મહત્વપૂર્ણ છે. બિયોન્ડ 23’ પોડકાસ્ટમાં બુમરાહે કહ્યું, મારા માટે, મારો પરિવાર મારી કારકિર્દી કરતા વધુ મહત્વપૂર્ણ છે કારણ કે તે કાયમ માટે છે. બે બાબતો છે જેને હું ખૂબ ગંભીરતાથી લઉં છું એક મારો પરિવાર અને બીજી મારી રમત. પરંતુ પરિવાર પહેલા આવે છે.

જો બુમરાહનું આ નિવેદન ચાહકોને ડરાવવા માટે પૂરતું નથી, તો તેણે તેની સાથે જે કહ્યું તેનાથી સ્પષ્ટ થાય છે કે તે સમય દૂર નથી જ્યારે તે નિવૃત્તિની જાહેરાત કરી શકે છે. બુમરાહે ઈન્ટરવ્યુમાં વધુમાં સંકેત આપ્યો હતો કે ત્રણેય ફોર્મેટમાં સતત રમવું મુશ્કેલ છે. બુમરાહે કહ્યું, દેખીતી રીતે કોઈ પણ વ્યક્તિ માટે લાંબા સમય સુધી બધું જ રમતું રહેવું મુશ્કેલ છે. હું ઘણા સમયથી આ કરી રહ્યો છું, પરંતુ થોડા સમય પછી તમારે તમારા શરીર પર પણ ધ્યાન આપવું પડશે, તે ક્યાં જઈ રહ્યું છે, કઈ મહત્વપૂર્ણ ટુર્નામેન્ટ છે.

બુમરાહના આ નિવેદન પરથી એ સમજવું બહુ મુશ્કેલ નથી કે આ સ્ટાર ફાસ્ટ બોલર આગામી સમયમાં કોઈ મોટો નિર્ણય લઈ શકે છે. પરંતુ પ્રશ્ન એ છે કે તે પહેલા કયું ફોર્મેટ છોડશે? જોકે, બુમરાહનું ધ્યાન હાલમાં ઈંગ્લેન્ડમાં ટેસ્ટ શ્રેણી જીતવા અને પછી આવતા વર્ષે ઝ20 વર્લ્ડ કપનો ખિતાબ જાળવી રાખવા પર રહેશે. જો તે પછી તે કોઈપણ એક ફોર્મેટમાંથી નિવૃત્તિ લે તો તે આશ્ચર્ય નહીં થાય.