વેસ્ટઇન્ડિઝ ટેસ્ટ ઇતિહાસના બીજા સૌથી નાના સ્કોર પર ઓલઆઉટ

ઓસ્ટ્રેલિયા સામે બીજા દાવમાં માત્ર 27 રનમાં ઓલઆઉટ

ઓસ્ટ્રેલિયાએ ટેસ્ટ શ્રેણીની ત્રીજી મેચમાં પણ વેસ્ટ ઈન્ડિઝને હરાવ્યું છે. આ મેચમાં વેસ્ટ ઈન્ડિઝનો બીજો દાવ ફક્ત 27 રનમાં સમેટાઈ ગયો હતો. આ ટેસ્ટ ઇતિહાસનો બીજો સૌથી ઓછો સ્કોર અને ડે-નાઈટ ટેસ્ટમાં સૌથી ઓછો સ્કોર છે. છેલ્લી ઈનિંગમાં વેસ્ટ ઈન્ડિઝને જીતવા માટે 204 રનનો લક્ષ્યાંક હતો. પરંતુ મિશેલ સ્ટાર્કની ઘાતક બોલિંગ સામે ટીમ 14.3 ઓવરમાં જ ક્લીન સ્વીપ થઈ ગઈ હતી. આ સાથે ઓસ્ટ્રેલિયાએ ત્રણ મેચની શ્રેણી 3-0થી ક્લીન સ્વીપ કરી દીધી હતી.

પોતાની 100મી ટેસ્ટ રમી રહેલા મિશેલ સ્ટાર્કે પોતાના કરિયરનો શ્રેષ્ઠ સ્પેલ ફેંક્યો હતો. તેણે 7.3 ઓવરમાં માત્ર 9 રન આપીને 6 વિકેટ લીધી હતી. તેણે માત્ર 15 બોલમાં પોતાની 5 વિકેટ પૂરી કરી હતી. આ સાથે સ્ટાર્કે ટેસ્ટ ક્રિકેટમાં 400 વિકેટ પણ પૂરી કરી લીધી છે. સ્કોટ બોલેન્ડે માત્ર 2 રન આપીને 3 બેટ્સમેનોને આઉટ કર્યા હતા. જોશ હેઝલવૂડને એક વિકેટ મળી હતી. વેસ્ટ ઈન્ડિઝના 7 બેટ્સમેન ખાતું ખોલાવી શક્યા નહીં. જસ્ટિન ગ્રીવ્સે સૌથી વધુ 11 રન બનાવ્યા હતા. ઓસ્ટ્રેલિયાએ એકસ્ટ્રા 6 રન આપ્યા હતા. આનાથી ટીમનો સ્કોર 27 રન પર પહોંચ્યો હતો.

ટેસ્ટ ઇતિહાસમાં સૌથી ઓછા સ્કોરનો વિશ્વ રેકોર્ડ ન્યૂઝીલેન્ડના નામે છે. 1955માં ઓકલેન્ડમાં ઇંગ્લેન્ડ સામે ન્યૂઝીલેન્ડનો દાવ ફક્ત 26 રનમાં સમેટાઈ ગયો હતો. દક્ષિણ આફ્રિકા બીજા ક્રમે હતું. ટીમ બે વાર 30 રનમાં ઓલઆઉટ થઈ ગઈ છે. પરંતુ હવે વેસ્ટ ઈન્ડીઝ યાદીમાં બીજા ક્રમે આવી ગયું છે. અગાઉ, ટેસ્ટમાં વેસ્ટ ઈન્ડીઝનો સૌથી ઓછો સ્કોર 47 રન હતો. ઇંગ્લેન્ડે 2004માં આ જ મેદાન પર તેમને ઓલઆઉટ કરી દીધા હતા. અગાઉ પિંક બોલ ટેસ્ટમાં સૌથી ઓછો 36 રનનો સ્કોર ભારતે બનાવ્યો હતો.