11 છગ્ગા, 9 ચોગ્ગા સાથે સલીલ અરોરાએ 39 બોલમાં ફટકારી સદી

ટીમ ઈન્ડિયાના ઘણા સ્ટાર ખેલાડીઓ સૈયદ મુશ્તાક અલી ટ્રોફી 2025માં ચમકી રહ્યા છે, ત્યારે ઘણી યુવા પ્રતિભાઓ પણ તેમના પ્રભાવશાળી પ્રદર્શનથી ચર્ચા જગાવી રહ્યા છે. પંજાબના બેટ્સમેન સલિલ અરોરા હવે આ રેન્કમાં જોડાઈ ગયો છે. શુક્રવારે પુણેમાં ઝારખંડ સામેની નોકઆઉટ મેચમાં સલીલે ધમાકેદાર સદી ફટકારી હતી. 23 વર્ષીય અરોરાએ ઇનિંગની છેલ્લી ઓવરમાં કહેર વરસાવ્યો અને લેફ્ટ હેન્ડેડ ફાસ્ટ બોલર સુશાંત મિશ્રાની ઓવરમાં ત્રણ છગ્ગા અને એક ચોગ્ગા ફટકાર્યા. તેની ઇનિંગના જોરે પંજાબે પ્રથમ બેટિંગ કરતા 20 ઓવરમાં 6 વિકેટે 235 રનનો વિશાળ સ્કોર બનાવ્યો હતો.IPL 2026 માટે મીની ઓક્શન 16 ડિસેમ્બરે અબુ ધાબીમાં યોજાવાનું છે. આ હરાજી માટે સલિલ અરોરાને વિકેટકીપર શ્રેણીમાં ₹30 લાખની બેઝ પ્રાઈસ સાથે સામેલ કરવામાં આવ્યો છે.

અરોરાએ છેલ્લા કેટલાક મેચોમાં સતત અસાધારણ સારું પ્રદર્શન કર્યું છે. તેના પ્રભાવશાળી પ્રદર્શનને જોતાં, ફ્રેન્ચાઇઝીઓ ઓક્શનમાં અરોરા પર મોટી બોલી લગાવી શકે છે. કોલકાતા નાઈટ રાઈડર્સ (KKR) પણ ભારતીય વિકેટકીપરની શોધમાં છે. તેથી, KKR તેને ખરીદવામાં રસ ધરાવી શકે છે. સલિલ અરોરાએ અત્યાર સુધીમાં નવ ફર્સ્ટ-ક્લાસ મેચ અને છ T20 મેચ રમી છે, જેમાં અનુક્રમે 458 અને 142 રન બનાવ્યા છે. ફર્સ્ટ-ક્લાસ ક્રિકેટમાં તેની પાસે એક સદી અને ત્રણ અડધી સદી છે.