પંજાબ કિંગ્સે LSGને 37 રને હરાવ્યું, પ્લેઓફની આશા મજબૂત

પ્રભસિમરનની 91 રનની તોફાની ઇનિંગ, અર્શદીપસિંહે ઝડપી ત્રણ વિકેટ

હિમાચલ પ્રદેશના ધર્મશાળામાં રમાયેલી આઇપીએલ 2025ની 53મી મેચમાં પંજાબ કિંગ્સે લખનૌ સુપર જાયન્ટ્સ (કજૠ) સામે 37 રનથી ભવ્ય વિજય નોંધાવીને પ્લેઓફમાં પહોંચવાની પોતાની આશાઓને વધુ મજબૂત બનાવી છે. પંજાબ કિંગ્સે પ્રથમ બેટિંગ કરતા નિર્ધારિત 20 ઓવરમાં 236 રનનો વિશાળ સ્કોર ખડક્યો હતો, જેના જવાબમાં લખનૌ સુપર જાયન્ટ્સની ટીમ માત્ર 199 રન જ બનાવી શકી અને મેચ હારી ગઈ.
પંજાબ કિંગ્સની ટીમે બેટિંગમાં ધમાકેદાર પ્રદર્શન કર્યું અને 236 રનનો મોટો સ્કોર બનાવ્યો. આમાં સૌથી મોટો ફાળો ઓપનર પ્રભસિમરન સિંહનો રહ્યો, જેણે 91 રનની તોફાની ઇનિંગ રમીને ટીમને આ વિશાળ સ્કોર સુધી પહોંચાડવામાં મદદ કરી.

236 રનના વિશાળ લક્ષ્યાંકનો પીછો કરવા ઉતરેલી લખનૌ સુપર જાયન્ટ્સની શરૂૂઆત અત્યંત ખરાબ રહી. તેમના બંને ઓપનિંગ બેટ્સમેન માત્ર 16 રનના સ્કોરે જ પેવેલિયન પરત ફર્યા. એડન માર્કરામ 13 રન બનાવી આઉટ થયો જ્યારે મિશેલ માર્શ પોતાનું ખાતું પણ ખોલી શક્યો નહીં. લખનૌના મુખ્ય બેટ્સમેનો જેવા કે નિકોલસ પુરાણ સતત પાંચમી મેચમાં મોટો સ્કોર કરવામાં નિષ્ફળ રહ્યો અને માત્ર 6 રન બનાવી આઉટ થયો. કેપ્ટન ઋષભ પંતનું ખરાબ ફોર્મ ચાલુ રહ્યું અને તે 17 બોલમાં માત્ર 18 રન બનાવી શક્યો. પરિસ્થિતિ એટલી બગડી કે લખનૌની અડધી ટીમ 73 રનના સ્કોરે જ પેવેલિયન ભેગી થઈ ગઈ. આ ઉપરાંત, ટીમના અન્ય મોટા યોદ્ધા ગણાતા ડેવિડ મિલર પણ ખાસ પ્રદર્શન કરી શક્યા નહીં.

73 રનમાં 5 વિકેટ ગુમાવ્યા બાદ, અબ્દુલ સમદ અને આયુષ બદોનીએ બાજી સંભાળવાનો પ્રયાસ કર્યો અને 81 રનની ભાગીદારી કરી. સમદે 24 બોલમાં 45 રન બનાવ્યા, પરંતુ ટીમ જીત તરફ આગળ વધી રહી હતી ત્યારે તે આઉટ થઈ ગયો. આયુષ બદોનીએ જોકે લડત ચાલુ રાખી અને 40 બોલમાં 5 ચોગ્ગા અને 5 છગ્ગાની મદદથી 74 રનની ઝડપી ઇનિંગ રમી, પરંતુ ત્યાં સુધીમાં ઘણું મોડું થઈ ગયું હતું. લખનૌને છેલ્લી ઓવરમાં જીતવા માટે 49 રન બનાવવાના હતા.

236 રનનો મોટો સ્કોર બનાવ્યા બાદ પંજાબના બોલરોએ પણ શાનદાર પ્રદર્શન કર્યું. ખાસ કરીને અર્શદીપ સિંહે પોતાની બોલિંગથી લખનૌના બેટ્સમેનો પર તરખાટ મચાવ્યો અને 3 મહત્વપૂર્ણ વિકેટ ઝડપી. 37 રનની આ ભવ્ય જીત સાથે પંજાબ કિંગ્સની ટીમ પ્લેઓફમાં જગ્યા બનાવવાની ખૂબ નજીક પહોંચી ગઈ છે. આ જીત સાથે, પંજાબ હવે 15 પોઈન્ટ સાથે પોઈન્ટ ટેબલમાં બીજા સ્થાને આવી ગયું છે. બીજી તરફ, લખનૌ સુપર જાયન્ટ્સ માટે આ મોટી હારના કારણે પ્લેઓફમાં પહોંચવાનો રસ્તો ખૂબ જ મુશ્કેલ બની ગયો છે.