પાકિસ્તાનની હારથી મહિલા T20 વર્લ્ડ કપમાં ભારતની સફર પૂર્ણ

મહિલા ઝ20 વર્લ્ડ કપમાં ભારતીય મહિલા ટીમની સફર હવે પૂરી થઈ ગઈ છે. ટીમ ઈન્ડિયા પાકિસ્તાન અને ન્યૂઝીલેન્ડ વચ્ચે રમાયેલી મેચના પરિણામ પર નિર્ભર હતી, પરંતુ આ મેચનું પરિણામ ટીમ ઈન્ડિયાના પક્ષમાં આવ્યું ન હતું અને ભારતીય ટીમને સેમીફાઈનલમાંથી બહાર થવું પડ્યું હતું. જો પાકિસ્તાનની ટીમે આ મેચમાં ન્યૂઝીલેન્ડને હરાવ્યું હોત તો ટીમ ઈન્ડિયા સેમીફાઈનલમાં પહોંચી ગઈ હોત, પરંતુ એવું થઈ શક્યું નહીં અને આ મેચમાં ન્યૂઝીલેન્ડે પાકિસ્તાનને 54 રને હરાવ્યું.

પાકિસ્તાન સામે મળેલી જીતને કારણે ન્યુઝીલેન્ડે મહિલા ટી20 વર્લ્ડ કપની સેમીફાઈનલમાં પોતાનું સ્થાન નિશ્ચિત કરી લીધું છે. ન્યૂઝીલેન્ડ સેમિફાઇનલમાં પહોંચનારી બીજી ટીમ છે. હવે ગ્રુપ અમાંથી બે ટીમો સેમિફાઇનલ માટે ક્વોલિફાય થઈ ગઈ છે. જેમાં ન્યુઝીલેન્ડ ઉપરાંત ઓસ્ટ્રેલિયાની ટીમનું નામ પણ સામેલ છે. વર્લ્ડ કપમાં ન્યુઝીલેન્ડની સફર શાનદાર રહી. તેઓ ગ્રુપ સ્ટેજ દરમિયાન રમાયેલી ચારમાંથી ત્રણ મેચ જીતી શક્યા છે. તેણે માત્ર ઓસ્ટ્રેલિયા સામે હારનો સામનો કરવો પડ્યો હતો.

પાકિસ્તાન અને ન્યુઝીલેન્ડ વચ્ચે રમાયેલી મેચની વાત કરીએ તો આ મેચમાં ન્યુઝીલેન્ડે ટોસ જીતીને પ્રથમ બેટીંગ કરવાનો નિર્ણય લીધો હતો અને પ્રથમ બેટીંગ કરતા ન્યુઝીલેન્ડની મહિલા ટીમે 20 ઓવરમાં 6 વિકેટ ગુમાવીને 110 રન બનાવ્યા હતા. આ પછી પાકિસ્તાનની ટીમ બેટિંગ કરવા મેદાનમાં આવી. જ્યાં તેની ટીમ 11.4 ઓવરમાં માત્ર 58 રનમાં ઓલઆઉટ થઈ ગઈ હતી. આ સાથે આ મેચમાં પાકિસ્તાનને શરમજનક હારનો સામનો કરવો પડ્યો હતો.

ભારત અને ન્યુઝીલેન્ડ ઉપરાંત પાકિસ્તાનની ટીમ પણ સેમીફાઈનલમાં પહોંચવાની રેસમાં હતી. જો કે, ન્યુઝીલેન્ડ દ્વારા આપવામાં આવેલા 111 રનના ટાર્ગેટનો પીછો તેમને 10.4 ઓવરમાં કરવાનો હતો. આ મેચની પ્રથમ ઇનિંગ દરમિયાન પાકિસ્તાને કુલ 8 કેચ છોડ્યા હતા. તેણે આ મેચની 5મી, 6મી, 8મી, 16મી અને 18મી ઓવરમાં એક-એક કેચ છોડ્યો હતો. આ સિવાય તેણે મેચની 20મી ઓવરમાં ત્રણ કેચ છોડ્યા હતા. આ મેચમાં પાકિસ્તાનના બેટ્સમેનોએ પણ નિરાશ કર્યા હતા. તેઓ 111 રનના નાના લક્ષ્યનો પીછો પણ કરી શક્યા ન હતા.