ફૂટબોલ ચાહકો આનંદો, ફિફા 2026 વર્લ્ડ કપ ટિકિટિંગ કાર્યક્રમ સપ્ટેમ્બરમાં શરૂ થશે

11 જૂને મેક્સિકોમાં પ્રારંભ, 48 ટીમો વચ્ચે 104 મેચ રમાશે

ફૂટબોલ ચાહકો માટે સારા સમાચાર છે! FIFA એ 2026 FIFA વર્લ્ડ કપ માટે ટિકિટિંગ પ્રક્રિયાની જાહેરાત કરી દીધી છે. આ ભવ્ય ટુર્નામેન્ટ યુનાઇટેડ સ્ટેટ્સ, મેક્સિકો અને કેનેડા દ્વારા સંયુક્ત રીતે આયોજિત કરવામાં આવશે, અને ટિકિટનું વેચાણ 10 સપ્ટેમ્બર, 2025 થી તબક્કાવાર રીતે શરૂૂ થશે. રસ ધરાવતા ચાહકોને FIFAની સત્તાવાર વેબસાઇટ પર પ્રી-રજિસ્ટર કરવા વિનંતી કરવામાં આવી છે જેથી તેઓ ટિકિટ અરજીના પ્રથમ તબક્કા માટે પાત્ર બની શકે.

FIFA ના સત્તાવાર નિવેદન અનુસાર, ટિકિટ વેચાણ પ્રક્રિયામાં 10 સપ્ટેમ્બર, 2025 થી 19 જુલાઈ, 2026 ના રોજ યોજાનારી ફાઇનલ મેચ સુધીના કેટલાક વિશિષ્ટ ટિકિટ વેચાણ તબક્કાઓનો સમાવેશ થશે. આગામી મહિનાઓમાં દરેક તબક્કા વિશેની વિગતો, જેમાં ચુકવણી પદ્ધતિઓ અને ટિકિટ શ્રેણીઓનો સમાવેશ થાય છે, ધીમે ધીમે જાહેર કરવામાં આવશે.

2026 વર્લ્ડ કપ ટુર્નામેન્ટ 11 જૂને મેક્સિકો સિટીમાં શરૂૂ થશે અને 19 જુલાઈએ ન્યુ જર્સીમાં સમાપ્ત થશે. આ ઇવેન્ટ અત્યાર સુધીનો સૌથી મોટો FIFA વર્લ્ડ કપ હશે, જેમાં 48 ટીમો અને 104 મેચોનો સમાવેશ થશે. કેનેડા અને મેક્સિકો દરેક 13 રમતોની યજમાની કરશે.

યુનાઇટેડ સ્ટેટ્સ બાકીની મેચોની યજમાની કરશે, જેમાં ક્વાર્ટર ફાઇનલથી આગળની તમામ નોકઆઉટ મેચોનો સમાવેશ થાય છે.

યજમાન શહેરો
* કેનેડા: ટોરોન્ટો, વાનકુવર
* મેક્સિકો: મેક્સિકો સિટી, ગુઆડાલજારા, મોન્ટેરે
* યુનાઇટેડ સ્ટેટ્સ: એટલાન્ટા, બોસ્ટન, ડલાસ, હ્યુસ્ટન, કેન્સાસ સિટી, લોસ એન્જલસ, મિયામી, ન્યુ યોર્ક / ન્યુ જર્સી, ફિલાડેલ્ફિયા, સાન ફ્રાન્સિસ્કો બે એરિયા, સિએટલ