લખનૌને 8 વિકેટે હરાવી દિલ્હી પોઇન્ટ ટેબલમાં બીજા સ્થાને
મુકેશકુમારે 4 વિકેટ ઝડપી, લખનૌ માટે હવે દરેક મેચ જીતવી જરૂરી
IPL 2025ના તાજા મુકાબલામાં દિલ્હી કેપિટલ્સે લખનૌ સુપર જાયન્ટ્સને એક આકર્ષક મેચમાં 8 વિકેટે હરાવી હતી. આ જીત સાથે દિલ્હી પોઈન્ટ ટેબલમાં બીજા સ્થાને પહોંચી ગઈ છે. મેચ દરમિયાન કેપ્ટન કેએલ રાહુલે એક નવો રેકોર્ડ પણ બનાવ્યો-તે IPL માં સૌથી ઓછી ઇનિંગ્સમાં 5000 રન બનાવનાર બેટ્સમેન બની ગયો. લખનૌ સુપર જાયન્ટ્સે પહેલાં બેટિંગ કરીને 20 ઓવરમાં 6 વિકેટના નુકસાને 159 રન બનાવ્યા.
એડન માર્કરામે 52 અને મિશેલ માર્શે 45 રનનું યોગદાન આપ્યું. લખનૌને મજબૂત શરૂૂઆત તો મળી, પરંતુ મધ્ય ઓવરોમાં વિકેટોની ઝડપી વિખુટીએ તેની રનગતીને ધીમી કરી નાખી. દિલ્હી તરફથી બોલિંગમાં મુકેશ કુમાર ચમકી ઉઠ્યો અને ચાર વિકેટ ઝડપી હતી, જ્યારે મિચેલ સ્ટાર્ક અને દુષ્મંથ ચમીરાએ એક-એક વિકેટ લીધી.
રાહુલ-પોરેલનો શાનદાર દેખાવલક્ષ્યનો પીછો કરતાં, દિલ્હીની શરૂૂઆત કદાચ નબળી રહી હતી, પરંતુ રાહુલ અને અભિષેક પોરેલે મેચની દિશા બદલી નાખી. પોરેલે 51 રન બનાવી તેનો IPL 2025 સીઝનનો પ્રથમ અડધી સદી ફટકારી. રાહુલે 42 બોલમાં અણનમ 57 રન બનાવી ટીમને વિજય તરફ દોરી. તેની સાથે અક્ષર પટેલે પણ 20 બોલમાં 34 અણનમ રન બનાવ્યા. રાહુલ અને અક્ષર વચ્ચે ત્રીજી વિકેટ માટે 56 રનની અણનમ ભાગીદારી નોંધાઈ. અંતે, દિલ્હી 17.5 ઓવરમાં 2 વિકેટ ગુમાવીને લક્ષ્ય હાંસલ કરી શકી.
આ જીત સાથે દિલ્હી કેપિટલ્સના 12 પોઈન્ટ થઈ ગયા છે. તે ગુજરાત ટાઇટન્સની બાજુમાં ઉભી છે, જો કે નેટ રન રેટના આધારે GT ટોચ પર છે. લખનૌ સુપર જાયન્ટ્સ 9 મેચમાં 10 પોઈન્ટ સાથે પાંચમા સ્થાને છે. રસપ્રદ વાત એ છે કે દિલ્હી માટે આ પાંચમી વખત છે જ્યારે તેણે IPL ની પ્રથમ આઠ મેચમાંથી છ જીત મેળવી છે. અગાઉ તે 2009, 2012, 2020 અને 2021માં પણ આવું કરી ચૂક્યું છે અને દરેક વખતે પ્લેઓફમાં પહોંચી ગયું હતું.
દિલ્હી કેપિટલ્સ હાલ શાનદાર ફોર્મમાં છે અને તેમની પ્લેઓફની ટિકિટ હવે વધુ નજીક દેખાઈ રહી છે. બીજી તરફ, લખનૌ માટે હવે આવનારી દરેક મેચ ખૂબ અગત્યની બનશે.
કે. એલ. રાહુલનો રેકોર્ડ, ફટકાર્યા IPL ના સૌથી ઝડપી 5000 રન
દિલ્હી કેપિટલ્સના બેટ્સમેન કેએલ રાહુલ આઇપીએલના ઇતિહાસમાં સૌથી ઝડપી 5000 રન ફટકારનાર ખેલાડી બન્યો છે. તેણે લખનઉ સુપર જાયન્ટ્સ સામેની મેચમાં આ સિદ્ધિ મેળવી હતી, જેમાં તેણે 57 રનની અણનમ ઇનિંગ રમી હતી. આ બાબતમાં તેણે ડેવિડ વોર્નરને પાછળ છોડી દીધો છે, જેમણે 135 ઇનિંગ્સમાં 5 હજાર રન પૂરા કર્યા હતા, જ્યારે રાહુલે 130 ઇનિંગ્સમાં આ સિદ્ધિ મેળવી છે. IPL માં KL રાહુલે 130 ઇનિંગ્સમાં સૌથી ઝડપી 5 હજાર રન પૂરા કર્યા છે. આ યાદીમાં ડેવિડ વોર્નર બીજા સ્થાને છે, જેમણે 135 ઇનિંગ્સમાં આ સિદ્ધિ હાંસલ કરી હતી અને વિરાટ કોહલી ત્રીજા સ્થાને છે તેણે 157 ઇનિંગ્સમાં આ સિદ્ધિ હાંસલ કરી હતી. આ યાદીમાં એબી ડી વિલિયર્સ - (161 ઇનિંગ્સ) , શિખર ધવન - (168 ઇનિંગ્સ) ના નામ પણ સામેલ છે.