અમેરિકન ટેનિસ સ્ટાર અમાન્ડાએ વર્લ્ડ નંબર વન સબાલેન્કાને હરાવી

વિમ્બલ્ડનના સેન્ટર કોર્ટ પર એક મોટો અપસેટ સર્જાયો હતો. અમેરિકાની ઉભરતી ટેનિસ સ્ટાર અમાન્ડા એનિસિમોવા એ વર્લ્ડ નંબર-1 અને ટોચની ક્રમાંકિત આર્યના સબાલેન્કાને ત્રણ સેટની રોમાંચક લડતમાં 6-4, 4-6, 6-4 થી હરાવીને પોતાની કારકિર્દીની સૌથી મોટી જીત હાંસલ કરી છે. આ વિજય સાથે, 23 વર્ષીય એનિસિમોવાએ તેની પ્રથમ ગ્રાન્ડ સ્લેમ ફાઇનલમાં સ્થાન મેળવ્યું છે, જ્યાં તે શનિવારે ઇગા સ્વિયાતેક અથવા બેલિન્ડા બેન્સિક સામે ટકરાશે.

આ સેમિફાઇનલ મુકાબલો બે કલાક અને 37 મિનિટ સુધી ચાલ્યો હતો. પ્રથમ સેટ દરમિયાન ગરમીના કારણે દર્શકોની તબિયત બગડતા બે વખત મેચમાં વિક્ષેપ પડ્યો હતો. જોકે, છતાં, બંને ખેલાડીઓએ તેમનું ધ્યાન જાળવી રાખ્યું હતું.

હાલમાં 12મા ક્રમે રહેલી એનિસિમોવાએ નિર્ણાયક ક્ષણોમાં પોતાની ધીરજ જાળવી રાખી હતી. જોકે, બીજા સેટમાં 30-લવની લીડ મેળવ્યા બાદ તેને પ્રથમ વખત સર્વિસ ગુમાવી પડી હતી, તેમ છતાં તેણે નિર્ણાયક સેટમાં ફરીથી મજબૂત પ્રદર્શન કર્યું. ઓપનિંગ ગેમમાં પોતાની સર્વિસ ગુમાવ્યા બાદ, તેણે તરત જ બ્રેક બેક કર્યો અને સતત ત્રણ ગેમ જીતીને મેચ પર નિયંત્રણ મેળવી લીધું.

સબાલેન્કાની આ હાર તેની સતત બે ગ્રાન્ડ સ્લેમ ફાઇનલમાં પહોંચવાની શ્રેણીનો અંત લાવે છે. ઉપરાંત, આ વર્ષે ત્રીજી વખત તેને કોઈ અમેરિકન ખેલાડી સામે ગ્રાન્ડ સ્લેમમાં હારનો સામનો કરવો પડ્યો છે. અગાઉ રોલેન્ડ ગારોસમાં કોકો ગોફ સામે અને મેલબોર્નમાં મેડિસન કીઝ સામે તે પરાજય પામી હતી.