રેકોર્ડ, પૃથ્વીએ રણજી ટ્રોફીના પ્રથમ સત્રમાં બે સદી ફટકારી

18 ચોગ્ગા અને 3 છગ્ગાની વિસ્ફોટક ઇનિંગ રમી

પૃથ્વી શો માટે છેલ્લા કેટલાક વર્ષ સારા રહ્યા નથી. તે ટીમ ઈન્ડિયા માટે રમ્યો ન હતો, એટલું જ નહીં, ઈજાને કારણે તે બીજે ક્યાંય પણ રમી શક્યો ન હતો. આ દરમિયાન પૃથ્વી શો ઘણા વિવાદો સાથે પણ જોડાયેલો હતો. પરંતુ હવે શોએ રણજી ટ્રોફીમાં શાનદાર વાપસી કરી છે. આ યુવા જમણા હાથના ઓપનિંગ બેટ્સમેને રણજી ટ્રોફીમાં છત્તીસગઢ સામે શાનદાર સદી ફટકારી હતી.

આ મેચમાં શોએ એટલા ચોગ્ગા અને છગ્ગા ફટકાર્યા કે તેણે પહેલા સેશનમાં જ પોતાની સદી પૂરી કરી લીધી. આ સાથે શોએ એક મોટો રેકોર્ડ પણ પોતાના નામે કરી લીધો છે.મુંબઈ તરફથી રમતા પૃથ્વી શોએ લગભગ 100ના સ્ટ્રાઈક રેટથી તેની 13મી ફર્સ્ટ ક્લાસ સદી પૂરી કરી. શોએ પહેલા દિવસે લંચ પહેલા જ પોતાની સદી પૂરી કરી હતી. આ ઈનિંગમાં તેણે 185 બોલમાં 159 રન બનાવ્યા હતા. તેની વિસ્ફોટક ઈનિંગમાં 18 ચોગ્ગા અને 3 છગ્ગાનો સમાવેશ થાય છે. શો હવે રણજી ટ્રોફી મેચના પ્રથમ સત્રમાં બે વખત સદી ફટકારનાર પ્રથમ બેટ્સમેન બની ગયો છે. આ પહેલા તેણે 2023માં પણ આસામ સામે આવું જ કર્યું હતું. લાંબા સમયથી રમતથી દૂર રહેલા શોએ ક્રિકેટમાં જોરદાર વાપસી કરી છે.

ગયા વર્ષે ઓગસ્ટમાં નોર્થમ્પટનશાયર માટે કાઉન્ટી ક્રિકેટ રમતી વખતે શોને ઘૂંટણની ઈજા થઈ હતી અને ત્યારથી તે નેશનલ ક્રિકેટ એકેડમીમાં સ્વસ્થ થઈ રહ્યો હતો. શોએ રણજી ટ્રોફીમાં મુંબઈની છેલ્લી મેચમાં પુનરાગમન કર્યું હતું. ત્યારબાદ તે બંગાળ સામે 35 રનની ઈનિંગ રમીને આઉટ થયો હતો. ઈજાગ્રસ્ત થયા પહેલા, શોએ કાઉન્ટી ક્રિકેટમાં વન-ડે કપમાં એક જ મેચમાં 244 રન બનાવ્યા હતા. તેણે ડરહામ સામે 125 રનની અણનમ ઈનિંગ પણ રમી હતી. શોને આઈપીએલ 2024 માટે દિલ્હી કેપિટલ્સ ટીમે જાળવી રાખ્યો હતો અને સારા સમાચાર એ છે કે તે આઈપીએલમાં રમવા માટે તે એકદમ ફિટ છે.