NIAને મળી મોટી સફળતા, રામેશ્વરમ કાફે બ્લાસ્ટ કેસના મુખ્ય શંકાસ્પદ આરોપીની કરાઇ અટકાયત

કર્ણાટકની રાજધાની બેંગલુરુમાં રામેશ્વરમ કાફેમાં થયેલા વિસ્ફોટના મામલામાં નેશનલ ઈન્વેસ્ટિગેશન એજન્સી (NIA)ને મોટી સફળતા મળી છે. NIAની ટીમે બ્લાસ્ટના શંકાસ્પદ આરોપીની અટકાયત કરી છે. એવું કહેવામાં આવી રહ્યું છે કે શંકાસ્પદનું નામ શબ્બીર છે જેને કર્ણાટકના બેલ્લારી જિલ્લામાંથી અટકાયતમાં લેવામાં આવ્યો છે. જોકે, હજુ સુધી એ જાણી શકાયું નથી કે આ એ જ વ્યક્તિ છે કે જેનો ફોટો સીસીટીવીમાં કેદ થયો હતો. હાલ NIAની ટીમ શંકાસ્પદ વ્યક્તિની પૂછપરછ કરી રહી છે.

વાસ્તવમાં, વિસ્ફોટ પછી, NIAએ શંકાસ્પદની તસવીર જાહેર કરી હતી. આ સાથે જ એક વીડિયો પણ સામે આવ્યો હતો જેમાં એક વ્યક્તિ માથા પર કેપ અને મોં પર માસ્ક પહેરીને હાથમાં બેગ લઈને રસ્તા પર ચાલી રહ્યો હતો. આ પછી તે કેફેની અંદર ગયો. NIA આ કેસમાં અલગ-અલગ પાસાઓની તપાસ કરી રહી છે.

1 માર્ચના રોજ રામેશ્વરમ કેફેમાં બ્લાસ્ટ થયો હતો. જેમાં એક વ્યક્તિનું મોત થયું હતું જ્યારે 10 જેટલા લોકો ઘાયલ થયા હતા. જેમાં એક મહિલા પણ સામેલ હતી. આ ઘટના બાદ કેફે અને તેની આસપાસ અંધાધૂંધી ફેલાઈ ગઈ હતી. લોકો પોતાનો જીવ બચાવવા માટે અહીં-તહીં દોડવા લાગ્યા. બેંગલુરુ પોલીસે ગેરકાનૂની પ્રવૃત્તિઓ નિવારણ અધિનિયમ (UAPA) અને વિસ્ફોટક ધારા હેઠળ કેસ નોંધ્યો હતો. જોકે, બાદમાં ગૃહ મંત્રાલયની સૂચના બાદ તપાસ NIAને સોંપવામાં આવી હતી. આ દરમિયાન NIAએ બ્લાસ્ટના આરોપીઓ પર 10 લાખ રૂપિયાનું ઈનામ રાખ્યું હતું. સૂટ આપનાર વ્યક્તિનું નામ ગુપ્ત રાખવામાં આવે તેવું પણ કહેવામાં આવ્યું હતું.

આરોપી સીસીટીવીમાં કેદ થયો હતો

બે દિવસ પહેલા કર્ણાટકના ગૃહમંત્રી જી પરમેશ્વરાએ કહ્યું હતું કે શંકાસ્પદની ઓળખ થઈ ગઈ છે. અને તેને પકડવાના પ્રયાસો હાથ ધરાયા છે. આ બ્લાસ્ટમાં IEDનો ઉપયોગ કરવામાં આવ્યો હતો. સીસીટીવી કેમેરાના ફૂટેજમાં આરોપી વ્યક્તિ બેગને કેફેમાં રાખતો કેદ થયો હતો. પોલીસ તપાસમાં સામે આવ્યું છે કે વિસ્ફોટ કરવા માટે ટાઈમર સાથેના IED ઉપકરણનો ઉપયોગ કરવામાં આવ્યો હતો.