'સેવામાં કોઈ ભૂલ થઈ હોય તો હું જનતા જનાર્દન પાસે માફી માંગુ છું..' મહાકુંભના સમાપન પર PM મોદીનું નિવેદન
45 દિવસ સુધી ચાલેલા ભવ્ય મહા કુંભ મેળાનું પ્રયાગરાજમાં સમાપન થયું છે. આ પ્રસંગમાં કરોડો ભક્તોએ શ્રદ્ધા અને ભક્તિ સાથે ત્રિવેણી સંગમમાં પવિત્ર સ્નાન કર્યું હતું. આ દરમિયાન પીએમ મોદીએ પ્રયાગરાજમાં સંપન્ન થયેલાં મહાકુંભને લઈને એક બ્લોગ લખ્યો છે. જેમાં તેમણે મહાકુંભને 'એકતાનો મહાયજ્ઞ' ગણાવ્યો છે. આ સાથે તેમણે મહાકુંભની વ્યવસ્થામાં રહેલી ખામીઓ માટે જનતાની માફી પણ માંગી છે.
વડાપ્રધાન નરેન્દ્ર મોદીએ પોતાના બ્લોગમાં લખ્યું કે, 'મહાકુંભ સંપન્ન થયો. એકતાનો મહાયજ્ઞ સંપન્ન થયો. પ્રયાગરાજમાં એકતાના મહાકુંભમાં સંપૂર્ણ 45 દિવસ સુધી જે પ્રકારે 140 કરોડ દેશવાસીઓની આસ્થા એકસાથે, એક સમયે આ એક પર્વથી આવીને જોડાઈ, આ અદ્ભુત છે! મહાકુંભના પૂર્ણ થતાં જે વિચાર મનમાં આવ્યો તેને મેં લખવાનો પ્રયાસ કર્યો છે.'
મહાકુંભમાં વ્યવસ્થાના અભાવ માટે માફી માંગતા પીએમ મોદીએ લખ્યું, 'મને ખબર છે, આટલા મોટા કાર્યક્રમનું આયોજન કરવું સરળ નહોતું. હું માતા ગંગા, માતા યમુના, માતા સરસ્વતીને પ્રાર્થના કરું છું. હે માતા, અમારી પૂજામાં કશી કમી હોય તો મને ક્ષમા કરજો. જનતા જનાર્દન જે મારા માટે ભગવાનનું સ્વરૂપ છે, જો ભક્તોની સેવા કરવામાં કમી પડી હોય તો હું જનતા જનાર્દનની પણ માફી માંગુ છું.
પીએમએ લખ્યું, 'આ કંઈક એવું છે જે છેલ્લા કેટલાક દાયકાઓમાં પહેલાં ક્યારેય બન્યું નથી. આ એવી વસ્તુ છે જેણે આવનારી ઘણી સદીઓ માટે પાયો નાખ્યો છે. કલ્પના કરતા પણ મોટી સંખ્યામાં ભક્તો પ્રયાગરાજ પહોંચ્યા. તેનું એક કારણ એ હતું કે પ્રશાસને જૂના કુંભના અનુભવોના આધારે એક અંદાજ પણ બનાવ્યો હતો, પરંતુ અમેરિકાની લગભગ બમણી વસ્તીએ એકતાના મહાકુંભમાં ભાગ લીધો અને ડૂબકી મારી.
મોદીએ કહ્યું કે પ્રયાગરાજમાં આયોજિત આ મહાકુંભ કાર્યક્રમ આધુનિક યુગના મેનેજમેન્ટ પ્રોફેશનલ્સ, પ્લાનિંગ અને પોલિસી એક્સપર્ટ્સ માટે અભ્યાસનો વિષય બની ગયો છે. આજે, આખી દુનિયામાં આટલી મોટી ઘટનાનું બીજું કોઈ ઉદાહરણ નથી, બીજી કોઈ સરખામણી નથી. આજે પોતાના વારસા પર ગર્વ ધરાવતું ભારત હવે એક નવી ઉર્જા સાથે આગળ વધી રહ્યું છે. આ યુગ પરિવર્તનનો અવાજ છે, જે દેશનું નવું ભવિષ્ય લખવા જઈ રહ્યું છે.
https://x.com/narendramodi/status/1894973807393415682
વડાપ્રધાન મોદીએ કહ્યું, 'જ્યારે હું ચૂંટણી માટે કાશી ગયો ત્યારે મારી અંદરની લાગણીઓને શબ્દોમાં વ્યક્ત કરી અને મેં કહ્યું- માતા ગંગાએ મને બોલાવ્યો છે. આમાં આપણી માતા સ્વરૂપા નદીઓની શુદ્ધતા અને સ્વચ્છતા અંગે જવાબદારીની ભાવના પણ હતી. પ્રયાગરાજમાં પણ ગંગા-યમુના-સરસ્વતીના સંગમ પર મારો સંકલ્પ વધુ મજબૂત બન્યો છે. ગંગાજી, યમુનાજી, આપણી નદીઓની સ્વચ્છતા આપણી જીવન યાત્રા સાથે જોડાયેલી છે. આપણી જવાબદારી છે કે નદી નાની હોય કે મોટી દરેક નદીને જીવનદાતા માતાનું મૂર્ત સ્વરૂપ માનીને આપણે આપણી અનુકૂળતા મુજબ નદી ઉત્સવ અવશ્ય ઉજવીએ. એકતાના આ મહાકુંભથી આપણને આપણી નદીઓને સ્વચ્છ રાખવા અને આ અભિયાનને વધુ મજબૂત બનાવવાની પ્રેરણા મળી છે.