તેલુગુ સુપરસ્ટાર પવનના ચાહકોએ થિયેટરમાં આગ લગાડી

‘કેમેરામેન ગંગાથો રામબાબુ’ ફિલ્મની રી-રિલીઝને આવકાર

તેલુગુ ફિલ્મોના સુપરસ્ટાર પવન કલ્યાણે પોતાની કારકિર્દીમાં અનેક બ્લોકબસ્ટર ફિલ્મો આપી છે. પવન કલ્યાણની વર્ષ 2012માં રિલીઝ થયેલી ફિલ્મ કેમરામેન ગંગાથો રામબાબુએ સમયે લગભગ રૂૂપિયા 52 કરોડ બિઝનેસ કર્યો હતો. 12 વર્ષ પછી હવે પવન કલ્યાણની આ ફિલ્મ ફરી થિયેટરોમાં રિલીઝ થઈ છે. પોતાના પ્રિય અભિનેતા પવન કલ્યાણની ફિલ્મની રી-રિલીઝને ચાહકોએ જોરદાર રીતે આવકારી છે.

ચાહકોએ આંધ્રપ્રદેશમાં નંદયાલા થિએટરની અંદર કાગળના ટુકડા સળગાવ્યા હતા. આ વીડિયોમાં જોઇ શકાય છે કે કેવી રીતે થિએટરમાં ચાલી રહેલી પવન કલ્યાણની ફિલ્મની વચ્ચે ચાહકોએ હાથમાં પ્લેકાર્ડ્સ અને કેટલાક કાગળના સળગતા ટુકડા પકડેલા છે અને એ પોતાની સીટ પર ઊભા થઈને ડાન્સ કરી રહ્યા છે.

જોકે, આવું પહેલીવાર થયું નથી. આ અગાઉ વર્ષ 2021માં પણ જોગુલમ્બા ગડવાલમાં એક થિએટરમાં જ્યારે પલન કલ્યાણની ફિલ્મને ટેકનીકલ ખામીને લીધે અડધેથી રોકવામાં આવી હતી, તો ચાહકોએ થિએટરમાં તોડફોડ કરી હતી. ઉલ્લેખનીય છે કે, દક્ષિણ ભારતમાં તેલુગુ, તમિલ, કન્નડ અને મલયાલમ ફિલ્મોના ચાહકો ફિલ્મોના સ્ટારો માટે ગમે તે હદ સુધી જતા હોય છે.