યમુનાના પૂરમાં દિલ્હી ડૂબ્યું, પંજાબમાં વરસાદના કહેરથી 30નાં મોત

દિલ્હી-ગુરુગ્રામના અનેક વિસ્તારોમાં પાણી ઘુસતા જનજીવન ઠપ; મેટ્રો-બસ સેવા બંધ; લોકોને ઘરેથી કામ કરવા સૂચના; 448 ફ્લાઇટોને અસર

પંજાબના 1300થી વધુ ગામડાઓ પૂરની ચપેટમાં ; 10 જિલ્લામાં 2.5 લાખ લોકો પ્રભાવિત, 15 હજારથી વધુનું સ્થળાંતર; પાક-ખેતીવાડીને ભારે નુકસાન

રાજધાની દિલ્હીમા ભારે વરસાદથી યુમના નદીએ 205 મીટરની ભયજનક સપાટી વટાવી દેતા અનેક વિસ્તારોમાં યમુના નદીનાં પુરનાં પાણી ઘુસી ગયા છે. સાથે જ ગુરુગ્રામમા સૌથી વધુ અસર દેખાઇ છે. જયા લાંબો સમય સુધી ટ્રાફીકજામ સર્જાયો છે. દિલ્હી - ગુરુગ્રામની બસ અને મેટ્રો સેવા પણ બંધ કરી દેવાઇ છે સાથે રસ્તા પર ભારે પુરને લીધે લોકોને વર્ક ફ્રોમ હોમ કરવાની સુચનાઓ આપી દેવાઇ છે. દિલ્હી એરપોર્ટ પર આજે સવારે 448 જેટલી ફલાઇટોનાં શેડયુલમા અસર થઇ છે. તો પંજાબમા પુરને લીધે 1300 થી વધુ ગામડાઓમા પાણી ઘુસી ગયા છે. 10 જીલ્લાઓમા કુલ 2.5 લાખ લોકોને અસર થઇ છે. 1પ688 લોકોને સલામત સ્થળે ખસેડવામા આવ્યા છે અને ગઇકાલ રાત્રી સુધીમા અલગ અલગ ઘટનાઓમા 30 જેટલા લોકોનાં મોત થયા છે. વડાપ્રધાન મોદીએ પણ પુરની પરિસ્થિતી અંગે પંજાબનાં મુખ્યમંત્રી ભગવંત માન સાથે ફોન પર વાત કરીને વરસાદ અને પુરની પરિસ્થિતીની ચર્ચા કરી હતી અને પરિસ્થિતીનો તાગ મેળવ્યો હતો.

દિલ્હી એનસીઆરના મોટાભાગના વિસ્તારોમાં સોમવારે ભારે પવન સાથે ભારે વરસાદ પડ્યો. પાણી ભરાઈ જવાથી અને રસ્તાઓ પર ટ્રાફિક જામ થઈ જવાથી વાહનો ફસાઇ ગયા હતા . ગુરુગ્રામમાં ભારે વરસાદને કારણે રસ્તાઓ પર પૂર જેવું દ્રશ્ય સર્જાયું. ફરીદાબાદમાં પણ પરિસ્થિતિ ખરાબ હતી. ગાઢ વાદળો અને ભારે વરસાદને કારણે દિલ્હીના પાલમ વિસ્તારમાં બપોરે 3 વાગ્યે દૃશ્યતાનું સ્તર ઘટીને 800 મીટર થઈ ગયું. આનાથી 400 થી વધુ ફ્લાઇટ્સ પ્રભાવિત થઈ હતી.

દિલ્હીમાં યમુના પૂરમાં છે. દિલ્હીમાં પૂરનો ભય મંડરાઈ રહ્યો છે. એવો અંદાજ છે કે આજ બપોર બાદ દિલ્હીમાં યમુનાનું પાણીનું સ્તર 205.33 મીટરના ભયના નિશાનથી લગભગ એક મીટર ઉપર પહોંચી શકે છે. સરકારે પૂરના ભય અંગે ચેતવણી જારી કરી છે અને યમુનાના નીચાણવાળા વિસ્તારોમાં દેખરેખ વધારી દીધી છે. પૂર નિયંત્રણ ટીમોને 24 કલાક માટે એલર્ટ રહેવા કહેવામાં આવ્યું છે. યમુના કિનારે આવેલા વિસ્તારોને ખાલી કરાવવાના નિર્દેશ આપવામાં આવ્યા છે. દિલ્હી ડિઝાસ્ટર મેનેજમેન્ટ વિભાગ (ઉઉખઅ ) એ યમુનામાં પૂરના ભયને ધ્યાનમાં રાખીને સોમવારે જૂના રેલ્વે પુલને બંધ કરવાનો આદેશ આપ્યો છે. આદેશ મુજબ, મંગળવારે સાંજે 5 વાગ્યાથી જ્યારે યમુનાનું પાણીનું સ્તર 206 મીટરને પાર કરશે, ત્યારે જૂના રેલ્વે પુલને લોકોની અવરજવર માટે બંધ કરી દેવામાં આવશે.આ વ્યવસ્થા આગામી આદેશો સુધી ચાલુ રહેશે. આ સમય દરમિયાન, જૂના રેલ્વે પુલ પરથી પસાર થતી ટ્રેનો પણ મર્યાદિત ગતિએ પસાર થશે.

દિલ્હી એરપોર્ટ પર કુલ 448 ફ્લાઇટ્સ પ્રભાવિત થઈ હતી. દિલ્હી એરપોર્ટ પર 95 આવનારી ફ્લાઇટ્સ અને 353 શેડ્યૂલ ફ્લાઇટ્સ મોડી પડી હતી. દિલ્હી એરપોર્ટ દ્વારા મુસાફરો માટે જારી કરાયેલી સલાહમાં, એવી આશંકા વ્યક્ત કરવામાં આવી છે કે મંગળવારે ખરાબ હવામાનને કારણે હવાઈ સેવાઓ પ્રભાવિત થઈ શકે છે. મુસાફરોને એરલાઇન્સ સાથે સંપર્કમાં રહેવાની સલાહ આપવામાં આવી છે.

પંજાબમાં આવેલા પૂરથી 10 થી વધુ જિલ્લાના 1,000 થી વધુ ગામડાઓ પ્રભાવિત થયા છે. આનાથી 2.5 લાખથી વધુ લોકો પ્રભાવિત થયા છે. મુખ્યમંત્રી ભગવંત માનએ દાવો કર્યો છે કે તેમની AAP સરકાર લોકોને દરેક પૈસાના નુકસાન માટે વળતર આપશે. જણાવવામાં આવ્યું છે કે સોમવાર સુધીમાં પંજાબમાં 30 લોકોના મોત થયા છે.

બીજી તરફ, કેન્દ્રીય કૃષિ મંત્રી શિવરાજ સિંહ ચૌહાણના કાર્યાલયે સોમવારે જણાવ્યું હતું કે તેઓ પાકને થયેલા નુકસાનનું મૂલ્યાંકન કરવા માટે ટૂંક સમયમાં પંજાબની મુલાકાત લેશે. એક સત્તાવાર નિવેદન અનુસાર, મંત્રીએ વિવિધ રાજ્યોમાં વરસાદની સ્થિતિની સમીક્ષા કરવા માટે એક બેઠક યોજી હતી અને પંજાબમાં પૂર અને પાક પર તેની અસર અંગે અધિકારીઓ સાથે વિગતવાર ચર્ચા કરી હતી.

ગુરદાસપુરથી 5549, પઠાણકોટથી 1139, અમૃતસરથી 1700, ફિરોઝપુરથી 3321, ફાઝિલકાથી 2049 અને હોશિયારપુરથી 1052 લોકોને સુરક્ષિત સ્થળોએ ખસેડવામાં આવ્યા છે. બર્નાલામાંથી 25, કપૂરથલામાંથી 515, તરનતારનમાંથી 60, મોગામાંથી 115 અને માનસામાંથી 163 લોકોને સુરક્ષિત સ્થળોએ ખસેડવામાં આવ્યા છે. બેઘર પરિવારોને તાત્કાલિક રહેઠાણ પૂરું પાડવા માટે પંજાબમાં 129 કેમ્પ સ્થાપવામાં આવ્યા છે.

અમૃતસરમાં 16, બર્નાલામાં 1, ફાઝિલ્કામાં 10, ફિરોઝપુરમાં 8, ગુરદાસપુરમાં 25, હોશિયારપુરમાં 20, કપૂરથલામાં 4, માનસામાં 1, મોગામાં 9, પઠાણકોટમાં 14, સંગરુરમાં 1 અને પટિયાલા જિલ્લામાં 20 કેમ્પનો સમાવેશ થાય છે.

ચીનથી આવીને વડાપ્રધાને સૌથી પહેલાં પંજાબની પરિસ્થિતિનો તાગ મેળવ્યો
વડાપ્રધાન નરેન્દ્ર મોદી ગઇકાલે ચીનથી એસસીઓ સમીટ પુરી કરીને દિલ્હી પાછા ફર્યા હતા. પાછા ફર્યા બાદ તેમને સૌથી પહેલા પંજાબનાં મુખ્યમંત્રી ભગવંત માન સાથે ટેલીફોનીક ચર્ચા કરી હતી અને પંજાબમા પુરની પરિસ્થિતિનો તાગ મેળવ્યો હતો તેમણે પંજાબ રાજયમા પડેલા વરસાદ અને પુર અંગે માહીતી મેળવી અસરગ્રસ્ત વિસ્તારોમા ઝડપથી રાહતકાર્ય પુરૂ કરવા માટે પણ મદદની ખાતરી આપી હતી.

ગુરુગ્રામમાં ટ્રાફિકજામમાં છ કલાક સુધી લોકો ફસાયા
ગુરુગ્રામમાં છેલ્લા ઘણા દિવસોથી અવારનવાર વરસાદ વરસી રહ્યો છે. સોમવાર બપોરથી વરસાદ બાદ વાહનોની ગતિ ધીમી પડી ગઈ હતી. છેલ્લા 6 કલાકથી NH-48 પર 4 કિલોમીટર લાંબો ટ્રાફિકજામ સર્જાયો છે. જેના કારણે હજારો વાહનો રસ્તા પર અટવાયેલા જોવા મળે છે. વરસાદ પછી, નરસિંહપુર, સેક્ટર 29, સેક્ટર 31, સેક્ટર 45, સેક્ટર 56, DLF ફેઝ 3 અને પાલમ વિહારના કેટલાક ભાગો સહિત ઘણા વિસ્તારો પાણીમાં ડૂબી ગયા છે. રસ્તાઓ પાણીથી ભરાઈ ગયા છે. રહેણાંક અને કોમર્શિયલ બિલ્ડિંગોના ભોંયરાઓ પાણીથી ભરાઈ ગયા છે. ભારે વરસાદને ધ્યાનમાં રાખીને જિલ્લા વહીવટીતંત્રએ શાળાઓને ઓનલાઈન વર્ગો અને કોર્પોરેટ ઓફિસોને ઘરેથી કામ કરવાની સુવિધા પૂરી પાડવાની સલાહ આપી છે.