પ્રયાગરાજ સ્ટેશને ભીડ બેકાબૂ, કેટલાક બેભાન: કાનપુર, ગયા, ચંદૌલીમાં મહાકુંભમાં જવા ધસારો

ઉત્તર પ્રદેશના પ્રયાગરાજમાં યોજાયેલા મહાકુંભમાં હજુ પણ લાખોની સંખ્યામાં શ્રદ્ધાળુઓ પહોંચી રહ્યા છે. દિલ્હી રેલવે સ્ટેશન પર નાસભાગમાં માર્યા 18 લોકોમાં મોટાભાગના શ્રદ્ધાળુઓ હતા, જ્યારે હવે પ્રયાગરાજના નૈની રેલવે સ્ટેશન પર પણ ભારે ભીડને કારણે સ્થિતિ કાબુ બહાર જતી રહી હતી, અહીંયા અનેક શ્રદ્ધાળુઓ ગભરામણનો ભોગ બન્યા હતા, જેને પગલે પ્રશાસન માટે ઇમર્જન્સી જેવી સ્થિતિ પેદા થઇ ગઇ હતી. સાંજ પડતા જ પરિસ્થિતિ કાબુ બહાર જતી રહી હતી ને કેટલાક શ્રદ્ધાળુઓ બેભાન થઇ ગયા હતા. દરમિયાન દિલ્હી રેલવે સ્ટેશન પર આકરા નિયમો લાગુ કરાયા છે.
ઉલ્લેખનીય છે કે નવી દિલ્હી રેલવે સ્ટેશન પર નાસભાગમાં 18 લોકો માર્યા ગયા હતા, ભારે ભીડને ધ્યાનમાં રાખીને હવે રેલવે સ્ટેશન પ્રશાસને કાઉન્ટર પરથી પ્લેટફોર્મ ટિકિટોનું વેચાણ 26મી તારીખ સુધી બંધ કરી દીધુ છે.

રેલવે સ્ટેશનો પર ભારે ભીડ ને કેટલાક સ્થળે કુંભ જનારા લોકોને જગ્યા ના મળતા ટ્રેનો પર પથ્થરમારા જેવી ઘટનાઓ નાસભાગ વગેરેને કારણે ઇસ્ટ સેન્ટ્રલ રેલવે (ઇસીઆર)એ સોમવારે જાહેરાત કરી હતી કે હવેથી રેલવે સ્ટેશનો પર આકરા પ્રતિબંધોનો અમલ કરાયો છે, કોઇ પણ વ્યક્તિને ટિકિટ વગર પ્રવેશ આપવામાં નહીં આવે.

દરમિયાન પ્રયાગરાજ મહાકુંભમાં આસ્થાના લોકોની ભીડ દરરોજ વધી રહી છે. જેના કારણે અહીં મોટી સંખ્યામાં શ્રદ્ધાળુઓ પહોંચી રહ્યા છે. આ જ કારણ છે કે પ્રયાગરાજ પહોંચતી દરેક ટ્રેનમાં ભક્તોની ભીડ જોવા મળી રહી છે. સ્થિતિ એવી છે કે કાનપુર, સતના, ગયા અને દીન દયાલ ઉપાધ્યાય જેવા રેલવે સ્ટેશનો પર મુસાફરોની ભીડ જોવા મળે છે.

કાનપુર સેન્ટ્રલ ખાતે કુંભ સ્પેશિયલ ટ્રેન દ્વારા મોકલવામાં આવેલા મુસાફરોથી આખું રેલવે સ્ટેશન ખીચોખીચ ભરેલું છે. મુસાફરોને આગળ વધવામાં મુશ્કેલી પડી રહી છે. વહીવટી અધિકારીઓ રેલવે સ્ટેશનની આસપાસ ઘૂમી રહ્યા છે અને માઈક્રોફોન દ્વારા મુસાફરોને માહિતી આપી રહ્યા છે.

મધ્યપ્રદેશના સતના અને રીવા સ્ટેશન પર પણ મહાકુંભમાં જતા મુસાફરોની ભીડ જોવા મળી રહી છે. અહીંથી દોડતી રેવા-આનંદ વિહાર ટ્રેનમાં ચઢવા માટે મુસાફરોમાં હરીફાઈ હતી. આ સિવાય પ્રયાગરાજથી પસાર થતી અન્ય ઘણી ટ્રેનોમાં પણ મુસાફરોની ભીડ જોવા મળી હતી. તે જ સમયે કુંભમાં જઈ રહેલી એક મહિલા પણ ભીડને કારણે બેહોશ થઈ ગઈ હતી.

બિહારમાંથી પણ મોટી સંખ્યામાં શ્રદ્ધાળુઓ પ્રયાગરાજ સંગમ પહોંચી રહ્યા છે. જેના કારણે બિહારના ગયા સહિત અન્ય રેલવે સ્ટેશનો પર મોટી સંખ્યામાં મુસાફરો એકઠા થઈ રહ્યા છે. જોકે, સ્ટેશનો પર નાસભાગ વગેરે જેવી ઘટનાઓ ન બને તે માટે વહીવટીતંત્ર સતર્ક છે. ભીડને કાબૂમાં લેવા માટે સ્ટેશન પર મોટી સંખ્યામાં પોલીસકર્મીઓ તૈનાત કરવામાં આવ્યા છે.

ચંદૌલીના દીન ઉપાધ્યાય રેલવે સ્ટેશન પર પણ ભક્તોની ભીડ ઉમટી રહી છે. સ્થિતિ એવી છે કે પંડિત દીનદયાળ ઉપાધ્યાય જંકશન પર રાત્રે 11:00 વાગ્યે બધે ભીડ દેખાતી હતી. અહીં પ્રયાગરાજ જતી લગભગ દરેક ટ્રેનમાં ભીડ દેખાતી હતી.
અન્ય એક અહેવાલ મુજબ દિલ્હી રેલવે સ્ટેશન પર નાસભાગની ઘટનાના પગલે આવું પુનરાવર્તન ટાળવા રેલવે તંત્રને જરૂરી તકેદારીનો આદેશ આપા સુપ્રીમ કોર્ટમાં જાહેર હિતની અરજી થઇ છે.