બિહારના ચંદન મિશ્રા કેસમાં પોલીસ, હત્યારાઓ વચ્ચે ગોળીબાર, બે ઘવાયા

બિહાર પોલીસ અને ગુનેગારો વચ્ચે એન્કાઉન્ટર થયું છે. ગુનેગારોએ પોલીસને જોતા જ ગોળીબાર શરૂૂ કરી દીધો હતો. આ પછી પોલીસે પણ વળતો જવાબ આપ્યો. આમાં બે ગુનેગારોને ગોળી વાગી છે. તેમાંથી એક ભોજપુરનો છે અને બીજો બક્સરનો છે.

પટણાની પારસ હોસ્પિટલમાં ચંદન મિશ્રાના હત્યા કેસમાં પોલીસે ફરી મોટી કાર્યવાહી કરી છે. આરાના બિહિયા વિસ્તારમાં ગુનેગારો અને સ્પેશિયલ ટાસ્ક ફોર્સ ટીમ વચ્ચે એન્કાઉન્ટર થયું છે. આમાં પોલીસની ગોળીથી બે ગુનેગારો ઘાયલ થયા છે. પોલીસે બંનેની ધરપકડ કરી છે. કહેવામાં આવી રહ્યું છે કે પોલીસ ટીમ ચંદન મિશ્રા હત્યા કેસના આરોપીઓને પકડવા ગઈ હતી. બિહિયા-કટૈયા માર્ગ પર નદી પાસે પોલીસને જોતા જ ગુનેગારોએ ગોળીબાર શરૂૂ કરી દીધો હતો. પોલીસે પણ વળતો પ્રહાર કર્યો. આમાં બે ગુનેગારોને ગોળી વાગી છે.

માહિતી અનુસાર, બક્સરના લીલાધરપુર પારસિયાના રહેવાસી બલવંત કુમાર સિંહ (22) ને હાથ અને પગમાં ગોળી વાગી હતી અને ભોજપુરના બિહિયાના ચાકરી ગામ રહેવાસી રવિ રંજન કુમાર સિંહને જાંઘમાં ગોળી વાગી હતી. પોલીસે બંનેને હોસ્પિટલમાં દાખલ કર્યા છે. બંનેની સારવાર ચાલી રહી છે. હોસ્પિટલની અંદર અને બહાર કડક સુરક્ષા વ્યવસ્થા છે. અહીં, પોલીસ ટીમે તેમની પાસેથી બે પિસ્તોલ, એક કટ્ટો, મેગેઝિન પણ જપ્ત કર્યા છે. પોલીસ પૂછપરછ દરમિયાન, બંને ગુનેગારોએ ચંદન મિશ્રા હત્યા કેસમાં સંડોવણી હોવાનું પણ કબૂલ્યું.
સોમવારે જ પટણા પોલીસની ટીમ ચંદન મિશ્રા હત્યા કેસના મુખ્ય આરોપી તૌસિફ ઉર્ફે બાદશાહ, નિશુ ખાન, ભીમ અને હર્ષને કોલકાતાથી પટણા લાવી હતી. પોલીસે ચારેયને કોર્ટમાં રજૂ કર્યા. કોર્ટે તૌસિફના 72 કલાકના રિમાન્ડ પણ મંજૂર કર્યા. નિશુ સહિત ત્રણેયને જેલમાં મોકલી દેવામાં આવ્યા. આ દરમિયાન, પોલીસ પૂછપરછ દરમિયાન, તૌસિફે પોતાનો ગુનો કબૂલ કર્યો અને કહ્યું કે બંગાળની પુરુલિયા જેલમાં શેરુ સિંહના કહેવાથી ચંદન મિશ્રાની હત્યા કરવામાં આવી હતી.