બિહારઃ રોહતાસ અને કટિહાર જિલ્લામાં નદીમાં સ્નાન કરવા ગયેલા 10 બાળકોના ડૂબવાથી મોત

બિહારના રોહતાસ અને કટિહાર જિલ્લામાં રવિવારે પાણીમાં નહાતી વખતે ડૂબી જવાથી 10 બાળકોના મોત થયા હતા. રોહતાસ જિલ્લામાં સોન નદીમાં ન્હાતી વખતે છ બાળકો ડૂબી ગયા, જ્યારે એક બાળક ગુમ છે. અન્ય એક બાળકને સ્ટેટ ડિઝાસ્ટર રિસ્પોન્સ ફોર્સ (SDRF) દ્વારા બચાવી લેવામાં આવ્યું હતું.

રોહતાસ જિલ્લા મેજિસ્ટ્રેટ ઉદિતા સિંહે પીટીઆઈને જણાવ્યું હતું કે આ ઘટના આજે સવારે બની હતી જ્યારે તુમ્બા ગામમાં કુલ આઠ બાળકો સોન નદીમાં સ્નાન કરી રહ્યા હતા. તેણે કહ્યું, “ગામવાસીઓના કહેવા પ્રમાણે, બાળકો અચાનક ઊંડા પાણીમાં ગયા. "ગામવાસીઓએ પોલીસને જાણ કરી, ત્યારબાદ સ્થાનિક પોલીસ અધિકારીઓ અને SDRFના જવાનો ઘટનાસ્થળે પહોંચ્યા અને બચાવ કામગીરી શરૂ કરી."

સિંહે કહ્યું કે સ્ટેટ ડિઝાસ્ટર રિસ્પોન્સ ફોર્સ (SDRF)ના જવાનોએ છ બાળકોના મૃતદેહ બહાર કાઢ્યા છે અને એક બાળક હજુ પણ ગુમ છે. જિલ્લા મેજિસ્ટ્રેટે જણાવ્યું હતું કે રેસ્ક્યૂ ટીમે અન્ય એક બાળકને બચાવી લીધો હતો જેને તાત્કાલિક સારવાર માટે નજીકની સરકારી હોસ્પિટલમાં લઈ જવામાં આવ્યો હતો, જ્યાં તેની હાલત ખતરાની બહાર હોવાનું કહેવાય છે.

તેમણે કહ્યું કે, 'ગુમ થયેલા બાળકને શોધવાના પ્રયાસો ગોતાખોરો દ્વારા ચાલુ છે. તમામ બાળકોની ઉંમર 10-12 વર્ષની છે. અમે મૃતકની ઓળખ મેળવવાનો પણ પ્રયાસ કરી રહ્યા છીએ. મૃતદેહોને પોસ્ટમોર્ટમ માટે મોકલી દેવામાં આવ્યા છે.અન્ય એક ઘટનામાં, રવિવારે કટિહાર જિલ્લાના કુરસેલા પોલીસ સ્ટેશન વિસ્તારના સરૈયા વિસ્તારમાં તળાવમાં ન્હાતી વખતે ચાર બાળકો ડૂબી ગયા હતા, પોલીસે જણાવ્યું હતું.

કુરસેલા પોલીસ સ્ટેશનના એક પોલીસ અધિકારીએ જણાવ્યું કે મૃતકોની ઓળખ કરવામાં આવી રહી છે. દરમિયાન, બિહારના મુખ્યમંત્રી નીતિશ કુમારે રોહતાસ અને કટિહાર જિલ્લામાં 10 બાળકોના મોત પર શોક વ્યક્ત કર્યો હતો.રવિવારે મુખ્યમંત્રી કાર્યાલય દ્વારા જારી કરાયેલા નિવેદન અનુસાર, કુમારે મૃતકોના પરિવારોને 4 લાખ રૂપિયાની એક્સ-ગ્રેશિયા રકમની જાહેરાત કરી હતી.