ઝારખંડમાં કેન્દ્રીય ગૃહમંત્રી અમિત શાહની સુરક્ષામાં મોટી ચૂક: નશામાં ધૂત યુવકો કરી રહ્યા હતા પીછો, પોલીસે 2 વ્યક્તિની કરી ધરપકડ
કેન્દ્રીય ગૃહ પ્રધાન અમિત શાહની સુરક્ષામાં આજે મોટી ચૂક થઇ છે. ભાજપના કાર્યક્રમમાં હાજરી આપવા ઝારખંડના રાંચી પહોંચેલા અમિત શાહના કાફલાનો કેટલાક લોકોએ પીછો કર્યો હતો. આ મામલે પોલીસે 2 વ્યક્તિની ધરપકડ કરી છે. પોલીસે જણાવ્યું કે આ લોકો નશામાં હતા.
સમાચાર એજન્સી ANI સાથે વાત કરતા હટિયા ડીએસપી પ્રમોદ કુમાર મિશ્રાએ જણાવ્યું કે આ લોકો કાફલામાં પ્રવેશી શક્યા ન હતા. તેણે કહ્યું કે આ લોકો ખૂબ જ ઝડપથી બાઇક ચલાવીને કાફલાનો પીછો કરી રહ્યા હતા. આ લોકો નશામાં હતા.
કેન્દ્રીય ગૃહ પ્રધાન અમિત શાહ આજે ભાજપની વિસ્તૃત કાર્ય સમિતિની બેઠકમાં ભાગ લેવા માટે રાંચી પહોંચ્યા હતા. જ્યારે તેમનો કાફલો બિરસા મુંડા એરપોર્ટથી સ્થળ માટે રવાના થયો ત્યારે બાઇક પર સવાર બે યુવકો કાફલામાં ઘૂસી ગયા હતા. જો કે પોલીસે બંને યુવાનોની તુરંત ધરપકડ કરી લીધી હતી. ANI સાથે વાત કરતા ડીએસપીએ ધરપકડ કરાયેલ યુવકને સમગ્ર મામલો જણાવવા કહ્યું. આ અંગે બંને યુવકોએ નશામાં હોવાની કબૂલાત કરી હતી. ડીએસપીએ કહ્યું કે હાલમાં સુરક્ષામાં કોઈ ખામી હોવાનું જણાતું નથી.
અમિત શાહના કાફલામાં બાઇક સાથે ઘૂસેલા બે યુવકોની ઓળખ પણ બહાર આવી છે. રિપોર્ટ્સ અનુસાર, એક વ્યક્તિનું નામ અંકિત અને બીજાનું નામ મોહિત છે. અમિત શાહની સુરક્ષાનો ભંગ કરનાર વ્યક્તિએ કહ્યું કે તેને ખબર નથી કે કોનો કાફલો જઈ રહ્યો છે. તેણે એમ પણ કહ્યું કે તે ગુનેગાર નથી.
ભાજપના નેતા અને કેન્દ્રીય ગૃહ પ્રધાન અમિત શાહ શનિવારે ભાજપની વિસ્તૃત કાર્ય સમિતિની બેઠકમાં પહોંચ્યા હતા. અહીં તેમણે દાવો કર્યો કે 2024ની વિધાનસભા ચૂંટણીમાં ભાજપ ઝારખંડમાં પૂર્ણ બહુમત સાથે સરકાર બનાવશે.