રાજસ્થાનના ચુરુમાં વાયુસેનાનું જગુઆર ફાઇટર પ્લેન ક્રેશ, 2 લોકોના મોત,

આજે રાજસ્થાનમાંથી મોટી દુર્ઘટના સામે આવી છે. રાજસ્થાનના ચુરુમાં ભારતીય વાયુસેનાનું ફાઇટર જેટ ક્રેશ થયું છે. ચુરુના રતનગઢ વિસ્તારના ભાનુડા ગામમાં આ દુર્ઘટના બની છે. આ દુર્ઘટનામાં 2 લોકોના મોત થયા છે. ફાઇટર જેટ જેવો કાટમાળ ઘટનાસ્થળે વિખરાયેલો છે.

આ દુર્ઘટના બાદ તરત જ પોલીસ અને વહીવટીતંત્રની ટીમો ઘટનાસ્થળે પહોંચી ગઈ છે. ગ્રામજનોની માહિતી મુજબ, આકાશમાં જોરદાર અવાજ બાદ ખેતરોમાં આગ અને ધુમાડો નીકળતો જોવા મળ્યો હતો.

ચુરુના એસપી જય યાદવે જણાવ્યું હતું કે રાજલદેસર પોલીસ સ્ટેશન વિસ્તારના ભાનુડા ગામમાં વિમાન દુર્ઘટના ઘટી છે. આમાં બે લોકોના મોત થયા છે. રાજલદેસર પોલીસને ઘટનાસ્થળે મોકલવામાં આવી છે. કાટમાળ પાસે વિકૃત હાલતમાં મૃતદેહોના ટુકડા મળી આવ્યા છે.

કાટમાળ નજીકથી એક મૃતદેહ મળી આવ્યો છે. જે સંપૂર્ણપણે ક્ષતિગ્રસ્ત હાલતમાં મળી આવ્યો છે. સ્થાનિક વહીવટીતંત્ર દ્વારા મૃતદેહની ઓળખ કરવાની પ્રક્રિયા કરવામાં આવી રહી છે. અકસ્માતના સમાચાર ફેલાતા જ રતનગઢમાં હંગામો મચી ગયો હતો.

ગ્રામજનોએ જણાવ્યું હતું કે વિમાન દુર્ઘટના પછી તરત જ ખેતરોમાં આગ લાગી હતી, જેને ગ્રામજનોએ જાતે જ ઓલવવાનો પ્રયાસ કર્યો હતો. ઘટનાના વિગતવાર કારણોની તપાસ ચાલુ છે.