ભુજ બસપોર્ટમાં હથિયાર લઇ ઘુસેલા શખ્સે મુસાફરોમાં ભયનો માહોલ ફેલાવ્યો

પોલીસે પકડી લેતા મુસાફરોએ હાશકારો અનુભવ્યો

શહેરના બસપોર્ટમાં ગુરુવારે રાત્રિના અરસામાં તીક્ષ્ણ હથિયાર અને લાકડી લઈને ફરતા માનસિક અસ્વસ્થ જણાતા યુવકે મુસાફરો સહિત લોકોમાં ભયનો માહોલ સર્જ્યો હતો. હાજર રહેલા લોકો અને સુરક્ષાકર્મીએ આ યુવકને ભગાડવાનો પ્રયત્ન કર્યો હતો, પણ અંતે પોલીસે આવીને તેની અટકાયત કરી હતી. નવા બનેલા બસ સ્ટેશનમાં કોઈ અજાણ્યો અને માનસિક અસ્વસ્થ લાગતો યુવક ઘૂસી આવ્યો હતો. તેના હાથમાં ધારિયું અને લાકડી જેવા હથિયારથી હાજર રહેલા લોકોમાં ડર છવાયો હતો.

સુરક્ષાકર્મી અને કેટલાક લોકોએ તેની પાસે રહેલા હથિયાર લેવાના પ્રયાસ કરતાં તેણે નાસવાની કોશિશ કરી હતી. લાંબી લમણાઝીંક બાદ અંતે પોલીસને બોલાવાતાં તેની અટક કરાઈ હતી. પોલીસે તેની પૂછપરછ કરતાં તે પોતાની ઓળખ આપી શક્યો નહોતો, તેથી તેને લઈ જતાં મુસાફરો સહિતના લોકોએ હાશકારો અનુભવ્યો હતો.