'અમે જ હમાસના વડા ઈસ્માઈલ હાનિયાને માર્યો, જે કોઈ અમારી સામે હાથ ઉપાડશે તેને કાપી નાખીશું', ઈઝરાયલે 5 મહિના બાદ સ્વીકાર્યું

ઇઝરાયેલે આજે(24 ડિસેમ્બર) સ્વીકાર્યું કે તેણે ઇરાનની રાજધાની તેહરાનમાં હમાસના ભૂતપૂર્વ વડા ઇસ્માઇલહાનિયાની હત્યા કરી હતી. આ સાથે તેણે યમનમાં હુથી વિદ્રોહીઓના નેતૃત્વને નષ્ટ કરવાની પણ ચેતવણી આપી છે. ન્યૂઝ એજન્સી એએફપીએ ઈઝરાયલના રક્ષા મંત્રી ઈઝરાયેલ કાત્ઝને ટાંકીને કહ્યું કે અમે હુથીઓ પર સખત હુમલો કરીશું. અમે તેમના નેતૃત્વનો નાશ કરીશું - જેમ અમે તેહરાન, ગાઝા અને લેબનોનમાં હનીએહ, (યાહ્યા) સિનવર અને (હસન) નસરાલ્લાહ સાથે કર્યું હતું, અમે હોદેદા અને સનામાં પણ આવું જ કરશું.

ઈઝરાયેલના સંરક્ષણ મંત્રી કાત્ઝે પોતાના નિવેદનમાં વધુમાં કહ્યું કે, "જે કોઈ ઈઝરાયેલ સામે હાથ ઉપાડશે તેનો હાથ કાપી નાખવામાં આવશે."

આ વર્ષે 31 જુલાઇના રોજ તેની હત્યાના લગભગ 5 મહિના પછી ઇઝરાયેલે હાનિયાના મૃત્યુની જવાબદારી સ્વીકારી છે. અગાઉ, વડા પ્રધાન બેન્જામિન નેતન્યાહૂની સરકારે હમાસના ભૂતપૂર્વ વડાની હત્યાનો ક્યારેય સ્વીકાર કર્યો ન હતો. પરંતુ હમાસ અને ઈરાન સતત ઈઝરાયેલ પર આરોપ લગાવી રહ્યા હતા.

ઇસ્માઇલ હાનિયાની કેવી રીતે હત્યા કરવામાં આવી?
31 જુલાઈના રોજ તેહરાનના એક ગેસ્ટહાઉસમાં થયેલા વિસ્ફોટમાં હાનિયાનું મોત થયું હતું. ઈરાનના રાષ્ટ્રપતિ મસૂદ પેઝેશ્કિયનના ઉદ્ઘાટનમાં હાજરી આપવા માટે હાનિયાના આગમનના અઠવાડિયા પહેલા ઇઝરાયેલી ઓપરેટિવોએ વિસ્ફોટકો રોપ્યા હોવાના અહેવાલ છે. ઈરાનના રિવોલ્યુશનરી ગાર્ડ્સે દાવો કર્યો હતો કે હાનિયાને તેમના ઘરની બહારથી છોડવામાં આવેલા "ટૂંકા અંતરના અસ્ત્ર"નો ઉપયોગ કરીને માર્યો ગયો હતો. તેહરાને યુએસ પર ઇઝરાયેલના ઓપરેશનને ટેકો આપવાનો આરોપ મૂક્યો છે અને તેહરાન અને તેના સાથી, હમાસ અને હિઝબુલ્લાહની ધમકીઓ બાદ યુ.એસ અને નૌકાદળના યુદ્ધ જહાજોને તૈનાત કરવા પડ્યા.