અમેરિકાએ ભારતને પ્રોજેક્ટાઇલ અને જેવેલિન મિસાઇલ સિસ્ટમ વેચવા મંજૂરી આપી

ભારતની તોપખાના અને ટેન્ક વિરોધી યુદ્ધ ક્ષમતાઓમાં નોંધપાત્ર સુધારો થશે. એક્સકેલિબર પ્રોજેક્ટાઇલ લાંબા અંતરની ચોકસાઇથી હુમલો કરવાની ક્ષમતા પૂરી પાડે છે, જ્યારે જેવેલિન મિસાઇલો ટેન્ક અને સશસ્ત્ર વાહનો સામે ખૂબ અસરકારક માનવામાં આવે છે.

અમેરિકાએ ભારત માટે બે મુખ્ય લશ્કરી ખરીદી દરખાસ્તોને મંજૂરી આપી છે. આમાં એક્સકેલિબર પ્રોજેક્ટાઇલ અને જેવેલિન મિસાઇલ સિસ્ટમનો સમાવેશ થાય છે. કુલ 93 મિલિયન (આશરે રૂૂ. 775 કરોડ) ના મૂલ્યના આ સંરક્ષણ સોદાઓની મંજૂરીથી બંને દેશો વચ્ચે વ્યૂહાત્મક સંરક્ષણ ભાગીદારી વધુ મજબૂત થવાની અપેક્ષા છે.

યુએસ ડિફેન્સ સિક્યુરિટી કોઓપરેશન એજન્સી (DSCA) અનુસાર, ભારતને વેચવામાં આવનાર એક્સકેલિબર પ્રોજેક્ટાઇલ્સ અને સંબંધિત સાધનોનું મૂલ્ય 47.1 મિલિયન છે, જ્યારે જેવેલિન મિસાઇલ સિસ્ટમ અને સંબંધિત સાધનોનું મૂલ્ય 45.7 મિલિયન છે.

DSCAના સત્તાવાર નિવેદન અનુસાર, આ પ્રસ્તાવિત વેચાણ યુએસ વિદેશ નીતિ અને રાષ્ટ્રીય સુરક્ષા ઉદ્દેશ્યોને પણ મજબૂત બનાવશે. એજન્સીએ જણાવ્યું હતું કે આ વેચાણથી અમેરિકા-ભારત વ્યૂહાત્મક ભાગીદારી મજબૂત થશે અને ભારત એક મુખ્ય સંરક્ષણ ભાગીદાર છે, તેની સુરક્ષા ક્ષમતાઓમાં વધારો થશે. તેમાં કહેવામાં આવ્યું છે કે ભારત ઇન્ડો-પેસિફિક અને દક્ષિણ એશિયા ક્ષેત્રમાં રાજકીય સ્થિરતા, શાંતિ અને આર્થિક પ્રગતિમાં મહત્વપૂર્ણ ભૂમિકા ભજવે છે.