સોના પર કોઇ ટેરિફ નહીં લાગે, ટ્રમ્પની જાહેરાતથી ભાવમાં મોટો કડાકો

સોના પર ભારે ટેરિફ લાદવાની અફવાઓ વચ્ચે, ડોનાલ્ડ ટ્રમ્પે સ્પષ્ટતા કરી છે કે સોના પર કોઈ ટેરિફ લાદવામાં આવશે નહીં. આ અફવાએ વિશ્વભરના બુલિયન બજારમાં ગભરાટ ફેલાવ્યો હતો. પરંતુ ટ્રમ્પે સ્પષ્ટતા કરતા હવે સોનામાં ઉચી સપાટીએથી રૂા.2000 પ્રતિ તોલા જેટલો ઘટાડો થયો છે.

યુએસ રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર પોસ્ટ કરીને પુષ્ટિ આપી છે કે સોના પર કોઈ ટેરિફ લાદવામાં આવશે નહીં. છેલ્લા કેટલાક દિવસોથી, એવી અફવા હતી કે રાષ્ટ્રપતિ ટ્રમ્પ સોના પર પણ ભારે ટેરિફ લાદવા જઈ રહ્યા છે. આ પછી, બુલિયન બજારમાં અરાજકતાનું વાતાવરણ હતું.

રાષ્ટ્રપતિ ડોનાલ્ડ ટ્રમ્પે છેલ્લા કેટલાક દિવસોમાં ભારત સહિત વિશ્વભરના દેશો પર ભારે ટેરિફ લાદવાની જાહેરાત કરી છે. ગયા અઠવાડિયે, વ્હાઇટ હાઉસના એક અધિકારીએ જણાવ્યું હતું કે ટ્રમ્પ વહીવટીતંત્ર ટૂંક સમયમાં એક નવી નીતિ રજૂ કરવા જઈ રહ્યું છે જે સ્પષ્ટ કરશે કે સોના પર આયાત ડ્યુટી લાદવામાં આવશે કે નહીં. આ પછી, અફવાઓનું બજાર પણ ગરમાયું અને બુલિયન બજાર અસ્થિર બનવા લાગ્યું.

બુલિયન બજારમાં હોબાળા વચ્ચે, સોનાના ભાવમાં જબરદસ્ત ઉછાળો જોવા મળ્યો. તે જ સમયે, ડોનાલ્ડ ટ્રમ્પના નિવેદન પછી, સોનાના ભાવમાં ઘટાડો જોવા મળી રહ્યો છે. શુક્રવારે, સોનાના ભાવ રેકોર્ડ ઉચ્ચ સ્તરે પહોંચ્યા.