કાલાવડના લક્ષ્મીપુરનો યૂ ટયૂબર યુવક રશિયામાં ભારતનું કરશે પ્રતિનિધિત્વ

ગુજરાત મિરર, રાજકોટ તા.22
તારીખ 19 થી 23 નવેમ્બરના રોજ રશિયાના મોસ્કો શહેરમાં મીડિયા એક્સપેડીશન - રશિયા ઈન ધ વર્ડ" કાર્યક્રમ યોજાવા જઈ રહ્યો છે. જેમાં આપણા ભારત દેશમાંથી વિશેષ પ્રતિભા ધરાવતા ફક્ત 3 બ્લોગર - યુટ્યુબરની પસંદગી થઇ છે. આપણા ગુજરાત અને રાજકોટનું ગૌરવ એવા જયદીપ સખીયાની પસંદગી થઇ છે. જેમાં જયદીપ સખીયાને ભારતીય ડેલિગેશન ના હેડ તરીકે વિશેષ જવાબદારી સોંપવામાં આવી છે.

આ વિશેષ કાર્યક્રમ International Youth Center of RUDN અને The Center of International Interaction and Cooperation, તેમજ The Ministry of Science and Higher Education, Russian Federationદ્વારા આયોજિત કરવામાં આવ્યો છે.

આ કાર્યક્રમમાં ભારત અને રશિયા સાથેના શૈક્ષણિક, આઇ.ટી. ઇનોવેશન, ક્લચરર એક્સચેન્જ, જેવા અગત્યના મુદ્દાઓ પર ચર્ચા કરશે. અને આગામી સમયમાં ભારતના તેમજ ખાસ આપણા ગુજરાતના યુવાનોને કઈ રીતે શ્રેષ્ઠ પ્લેટફોર્મ પૂરું પડી શકાય તેવા અગત્યના મુદ્દાઓ પર ચર્ચા કરવામાં આવશે.

જયદીપ સખીયા કાલાવડ તાલુકાના લક્ષ્મીપુર ગામના વતની છે અને ભારત સરકારના "સ્કિલ ઇન્ડિયા" ના Media and Entertainment Skills Council (MESC) માં ડિજિટલ માર્કેટિંગના વિવિધ 17 વિષયોમાં સર્ટિફાઈડ માસ્ટર ટ્રેનર છે. તેમજ આપણા રંગીલા સિટી રાજકોટમાં ડિજિટલ માર્કેટિંગના વ્યવસાય સાથે જોડાયેલા છે. ઇન્સ્ટાગ્રામ જેવા વિવિધ સોસીયલ મીડિયા પ્લેટફોર્મ ના માધ્યમ થી The Glocal Gujaratiનામના પેજ પર ખાસ કાઠિયાવાડી અંદાજમાં રસિયાની જર્ની રજુ કરેલી છે અને ડેઇલી લાઈફ બ્લોગ બનાવી રહ્યા છે.ખાસ રશિયામાં, આંતરરાષ્ટ્રીય લેવલ પર ભારત તેમજ ગુજરાતને સતત બીજી વખત રીપ્રેઝન્ટ કરવા માટે જયદીપ સખીયાને તેમના વોટસેપ્પ નંબર 8200549276 પર શુભેચ્છાઓ આવી રહી છે.