રાજ્યભરમાં નવા બાંધકામ પ્લાનની કામગીરી ઠપ્પ

ઇમ્પેક ફીની કામગીરીનો વધારાનો લોડ ઇ-નગર પોર્ટલ પર આવતા સતત સર્વર ડાઉનની સમસ્યાથી અપલોડ કામગીરી અટવાઇ

બિલ્ડર લોબી દ્વારા ટીડિઓ વિભાગ અને સરકારને રજૂઆત

રાજકોટ સહિત રાજ્યભરમાં નવા બાંધકામ પ્લાનની કામગીરી છેલ્લા 15 દિવસથી ઠપ્પ થઇ ગયાની ફરિયાદો ઉઠવા પામી છે. ઇ-નગર પોર્ટલમાં ખામી સર્જતા વારંવાર સર્વર ડાઉન થવાની ઘટનાના પગલે નવા પ્લાન અપલોડ કરવામાં સમસ્યા સર્જતા બિલ્ડર લોબીમાં દેકારો બોલી ગયો છે અને કોર્પોરેશનના ટીડિઓ વિભાગ તેમજ સરકારમાં આ અંગે રજૂઆત કરવામાં આવી છે. દરેક મહાનગર પાલિકામાં ટીડિઓ મારફતે ઓફલાઇન પ્લાન અપલોડની કામગીરી ચાલુ છે. પરંતુ ઓફલાઇન કામગીરીમાં સમયનો વેડફાટ થતો હોય મોટાભાગનું કામ ઓનલાઇન થઇ રહ્યું છે. જેના લીધે બાંધકામ પ્લાન ઓપલોડની કામગીરી ઠપ્પ થઇ ગયાનું જાણવા મળેલ છે.

નવા બાંધકામ માટે ઓનલાઈન મુકવામાં આવતા પ્લાનનું સર્વર છેલ્લા 15 દિવસથી ઠપ હોવાથી તમામ કામગીરી અટકી પડી છે. ઈ-નગર પોર્ટલ રાજ્ય સરકાર દ્વારા અમલી છે અને તેમાં ખરાબી સર્જાતા શહેરના તમામ નવા પ્લાનની કામગીરી અટવાઈ પડી છે. આ પોર્ટલ ક્યારે શરૂૂ થશે તેની કોઈ સત્તાવાર જાહેરાત કરવામાં આવી નથી. જેથી હાલમાં પ્લાનની કામગીરી કરાવવા માંગતા અરજદારો મૂંઝવણમાં મૂકાયા છે. શહેરના બિલ્ડર લોબીમાંથી મળેલી માહિતી અનુસાર, અમદાવાદ સહિતના શહેરમાં હાલ નવા બાંધકામના પ્લાન ઓનલાઈન મૂકાતા નથી. સર્વર ડાઉન હોવાના કારણે છેલ્લા 15 દિવસથી કામગીરી રોકી દેવામાં આવી હોવાનું જાણવા મળે છે. ઘણા પ્લાન રોકાઈ જતાં બિલ્ડરો અકળાયા છે. આ સર્વરની અસર સમગ્ર રાજ્યમાં જોવા મળી રહી છે. કારણે કે ઈ-નગર પોર્ટલ પરથી જ નવા બાંધકામના પ્લાન અપલોડ કરવાના હોય છે. કેટલાક અધિકારીઓએ એમ પણ જણાવ્યું હતું કે, રાજ્યભરમાંથી નવા બાંધકામના પ્લાન રજૂ થતાં હોવાથી સિસ્ટમ લોડ સહન કરી શકતું નથી અને વારંવાર સર્વર ડાઉન થઈ જાય છે. આ અંગે બિલ્ડર લોબીએ પણ સરકારમાં રજૂઆતો કરી છે.

પ્રતિદિન 400થી વધુ પ્લાન સમગ્ર રાજ્યમાંથી રજૂ થતાં હોય છે. આ ઉપરાંત ઈમ્પેક્ટ ફીની કામગીરી પણ તેમાંથી જ થતી હોવાથી લોડ વધુ પડી રહ્યો છે. તેમજ રજાચિઠ્ઠીથી માંડી ટીડીઓ દ્વારા પ્લાનને લગતી ક્વેરી પણ ઓનલાઈન થતી હોવાથી વારંવાર ડોક્યુમેન્ટ અપલોડ કરવા પડે છે. આ સ્થિતિમાં સર્વર ઘણી વખત ડાઉન થઈ જાય છે. સરકારના પોર્ટલમાંથી નવા બાંધકામના પ્લાન મ્યુનિ.ના પોર્ટલમાં આવતા ઘણો સમય વીતી જાય છે અને ત્યારબાદ એન્જિનિયર દ્વારા અપલોડ અને મકાન માલિક દ્વારા અપલોડ કરવામાં પણ ઘણો સમય વીતી જાય છે. આ બાબતે સર્વર ડાઉનની ફરિયાદો વારંવાર થતી હોય છે. નાણાં ભરવાની પહોંચ અપલોડ કરવામાં ત્રણથી ચાર દિવસનો સમય વીતી જતો હોવાથી મ્યુનિ.ના ટીડીઓ વિભાગને વારંવાર ફરિયાદો કરવામાં આવે છે.

મ્યુનિ.ના અધિકારીઓ પણ સરકારમાં સર્વર ડાઉન છે તેવો જવાબ આપી સંતોષ વ્યક્ત કરી દેવામાં આવી રહ્યો છે. મહાનગરપાલિકા વિસ્તારમાં 16 મીટરથી નાના બંગલાઓ, રો-હાઉસના પ્લાન અપલોડ થવામાં ત્રણથી ચાર મહિનાનો સમય વીતી જાય છે. સરકારને વારંવાર રજૂઆત કરી છે, પરંતુ શહેરી વિકાસ વિભાગ દ્વારા કોઈ પગલાં ભરાતા નથી. 16 મીટરથી નાના બંગલાનો પ્લાન એક તો બે વર્ષે મંજૂર થયો અને તેની રજાચિઠ્ઠી મળી સરકારમાંથી મ્યુનિ.ના મોડ્યુઅલમાં પ્લાન આવતા દોઢ વર્ષનો સમય જતો રહ્યો હતો. મ્યુનિ.એ આ પ્લાન ગણતરીના દિવસોમાં જ પાસ કરી દીધો હતો. પ્લાન પાસ કરનાર અધિકારીનો આ અંગે સંપર્ક કરવાનો પ્રયાસ કરાયો હતો, પરંતુ થઈ શક્યો ન હતો. છતા ઓનલાઇન કામગીરી વધુ રહેતા સતત લોડના કારણે સર્વર ડાઉન થવાની ઘટનામાં વધારો જોવા મળી રહ્યો છે.

પોર્ટલ અપગ્રેડની કામગીરી શરૂ
રાજ્યભરની મહાનગરપાલિકાઓમાં ઇ-નગર પોર્ટલનું સર્વર સતત ડાઉન રહેતા નવા બાંધકામના પ્લાનની કામગીરી ઠપ્પ થઇ ગઇ છે. આથી બિલ્ડર લોબી દ્વારા આ અંગે સરકારમાં રજૂઆત કરતા શહેરી વિકાસ વિભાગના એક વરિષ્ઠ અધિકારીએ જણાવ્યું હતું કે ભારે ટ્રાફિક અને કામના ભારણને કારણે સર્વર ધીમું પડી ગયું છે અને હાલમાં તેને અપગ્રેડ કરાઈ રહ્યું છે. આ કામ ટૂંક સમયમાં પૂર્ણ થવાની અપેક્ષા છે, જેનાથી અપલોડિંગ પ્રક્રિયા ઝડપી બનશે તેમજ પોર્ટલમાં સમસ્યા થઇ રહી છે. તે પ્રકારના અપલોડીંગ ડોક્યુમેન્ટમાં પણ સુધારા વધારા કરવામાં આવશે