ચાલુ વૈશાખે અષાઢના એંધાણ? વધુ સાત દી’ માવઠાની મોકાણ!

હવામાન ખાતાની ગુજરાતભરને પલાળે એવી આગાહી

ગુજરાતમાં ભરઉનાળે વરસાદ વરસી રહ્યો છે. રાજ્યના અનેક જિલ્લાઓમાં આજે પણ હવામાન વિભાગ દ્વારા ભારે વરસાદની આગાહી કરવામાં આવી છે. સૌરાષ્ટ્ર- કચ્છ સહિત રાજ્યમાં હજુ સાત દિવસ છૂટ્ટાછવાયા વરસાદની આગાહી હવામાન વિભાગ દ્વારા કરવામાં આવી છે. કમોસમી વરસાદના કારણે ખેડૂતો પણ મુશ્કેલીમાં મૂકાયા છે. વૈશાખ મહિનામા અષાઢ જેવો માહોલ સર્જાયો છે.

આવતીકાલે રાજ્યના 18 જિલ્લામાં કમોસમી વરસાદની આગાહી કરવામાં આવી છે. ગુજરાતમાં આજે વડોદરા, છોટાઉદેપુર, નર્મદા, ભરૂૂચ, સુરત, ડાંગ, નવસારી, વલસાડ, તાપી, સાબરકાંઠા, અરવલ્લી, પંચમહાલ, દાહોદ, મહિસાગર, રાજકોટ, જૂનાગઢ, અમરેલી, ભાવનગર, ગીર સોમનાથ અને બોટાદમાં પવન સાથે કમોસમી વરસાદની આગાહી કરવામાં આવી છે.

ભારે વરસાદની સાથે 40થી 50 કિમી પ્રતિ કલાકની ગતિએ પવન ફૂંકાવવાની પણ શક્યતા છે. હવામાન વિભાગે હળવાથી મધ્યમ વરસાદનું અનુમાન વ્યક્ત કર્યું છે. આ તરફ અમદાવાદ ઉપરાંત અન્ય સ્થળોએ ગરમીનો પારો ઉંચકાવવાનું પણ અનુમાન વ્યકત કરાયું છે. અમદાવાદમાં તાપમાનનો પારો 40 ડિગ્રીને પાર થવાની શક્યતા હવામાન વિભાગે વ્યકત કરી છે.

સૌરાષ્ટ્રમાં અમરેલી, ભાવનગર, રાજકોટ, મોરબી, જૂનાગઢ, ગીર સોમનાથ અને અરવલ્લીમાં વરસાદની આગાહી કરવામાં આવી છે. સુરત, તાપી, ડાંગ, નવસારી અને વલસાડમાં પણ કમોસમી વરસાદ વરસી શકે છે.
હવામાન વિભાગની આગાહી અનુસાર રાજ્યમા રાજકોટ , અમરેલી, જૂનાગઢ, ગીર સોમનાથ, ભાવનગર, મહીસાગર, પંચમહાલ, દાહોદ, છોટા ઉદેપુર, સાબરકાંઠા, અરવલ્લી,પંચમહાલ, વડોદરા, ભરૂૂચ, નર્મદા, તાપી, ડાંગ, સુરત, નવસારી અને વલસાડમાં ભારે પવન સાથે વરસાદની સાત દિવસ સુધી શકયતા વ્યકત કરાઇ છે .