પત્ની બે સંતાન સાથે રિસામણે ચાલી જતા પતિએ કર્યો આપઘાત

માન સરોવર પાર્કની ઘટના: માતા કામ પરથી ઘરે આવતા પુત્રનો મૃતદેહ લટકતો’તો

શહેરમાં આજીડેમ ચોકડી પાસે આવેલ માનસરોવર પાર્કમાં રહેતી પરિણીતા બે સંતાનો સાથે રિસામણે ચાલી જતા યુવાને ગળેફાંસો ખાઇ આપઘાત કરી લીધો હતો. માતા કામ પરથી ઘરે આવતા પુત્રનો મૃતદેહ લટકતો જોવા મળતા અરેરાટી સાથે ગમગીની છવાઈ જવા પામી હતી.

આ બનાવ અંગે પોલીસમાંથી જાણવા મળતી વિગત મુજબ આજીડેમ ચોકડી પાસે આવેલ માનસરોવર પાર્કમાં રહેતા જેશાભાઇ વાલજીભાઈ ખીહડીયા નામનો 33 વર્ષનો યુવાન પોતાના ઘરે હતો. ત્યારે પંખામાં દોરી બાંધી ગળેફાંસો ખાઇ આપઘાત કરી લીધો હતો. આ ઘટના અંગે જાણ થતા આજીડેમ પોલીસ મથકનો સ્ટાફ તાત્કાલિક ઘટના સ્થળે દોડી ગયો હતો અને પોલીસે જરૂૂરી કાર્યવાહી કરી યુવકના મૃતદેહને પોસ્ટ મોટમ માટે સિવિલ હોસ્પિટલ ખાતે ખસેડ્યો હતો.

પ્રાથમિક પૂછપરછમાં મૃતક જેશાભાઇ ખીહડીયાને સંતાનમાં બે પુત્ર છે અને જેશાભાઇ ખીહડીયા એ.જે. સ્ટીલમાં નોકરી કરી પરિવારનું ગુજરાન ચલાવતો હતો. દંપતી વચ્ચે અણબનાવ બનતા પત્ની બંને પુત્રો સાથે ચાલી ગયા બાદ પરત નહીં આવતા જેશાભાઈ ખીહડીયાને માઠું લાગી આવતા ગળેફાંસો ખાઇ આપઘાત કરી લીધો હતો. અને કામ પરથી પરત ફરેલી માતા પુત્રનો લટકતો મૃતદેહ જોઈ જતા પાડોશી અને પોલીસને જાણ કરી હોવાનું જાણવા મળ્યું છે. આ બનાવ અંગે આજીડેમ પોલીસ મથકના સ્ટાફે નોંધ કરી વધુ તપાસ હાથ ધરી છે.