રિયલ એસ્ટેટમાં મંદીની વાપસી : દસ્તાવેજ નોંધણી-સ્ટેમ્પ ડયૂટી આવકમાં 6 કરોડનું ગાબડું
જુલાઈ મહિનામાં તેજીના ટકોરા બાદ ફરીથી ઓગસ્ટમાં માર્કેટ બેસી ગયું; એક માસમાં 2128 દસ્તાવેજો ઓછા નોંધાયા
રાજકોટ શહેર-જિલ્લામાં રિયલ એસ્ટેટ ક્ષેત્રમાં મંદીનો મોહોલ ફરી શરૂ થયો છે. જૂન મહિનામાં મંદી રહ્યા બાદ જુલાઈનાં થોડો ઉછાળો આવ્યો હતો. પરંતુ ઓગસ્ટ મહિનામાં ફરી રીયલ એસ્ટેટ તંત્રે મંદી હાવી થઈ હતી. ઓગસ્ટ મહિનામાં જુલાઈ કરતાં 2128 દસ્તાવેજ ઓછા નોંધાયા હતાં. શહેર-જિલ્લાની 18 સબરજીસ્ટ્રાર ઓફિસના દસ્તાવેજ નોંધણી આવકના ડેટા પ્રમાણે મે અને જૂન મહિનામાં દસ્તાવેજ નોંધણીમાં સતત ઘટાડો થયા બાદ જુલાઈ મહિનામાં વધારો નોંધાયો હતો. જુલાઈ મહિનામાં દસ્તાવેજ નોંધણીની કુલ આવક 70,18,89,794 પહોંચી હતી જે હવે ઓગસ્ટ મહિનામાં 6 કરોડ જેટલી ઘટીને 64,99,94,214 થઈ ગઈ છે. જ્યારે જૂન મહિનામાં તે ફકત રૂૂા. 66,71,02,136 હતી. ઓગસ્ટ મહિનામાં કુલ 11,252 દસ્તાવેજ નોંધાયા હતાં. જેની નોંધણી ફી પેટે 9,15,42,757 રૂૂપિયાની આવક થઈ હતી. જ્યારે સ્ટેમ્પ ડયુટી પેટે રૂૂા.55,84,51,457 ની આવક થતાં કુલ આવક 64,99,94,214 નોંધાઈ હતી.
જ્યારે જૂન મહિનામાં દસ્તાવેજની નોંધણી પેટે 56.87 કરોડની આવક થઈ હતી. જે મે મહિના કરતાં આશરે 9 કરોડ જેટલી ઘટી છે. તેમજ મે મહિનામાં 14580 દસ્તાવેજ સામે જૂન મહિનામાં 12088 દસ્તાવેજની નોંધણી થઈ હતી. જુલાઈમાં 13,380 દસ્તાવેજ નોંધાયા હતાં. વૈશ્ર્વિક પરિસ્થિતિ જોતા બે મોરચે યુધ્ધ ચાલી રહ્યાં છે. તેમજ સોના અને ચાંદીમાં આગ ઝરતી તેજી છે ત્યારે લોકો હાલની પરિસ્થિતિમાં જમીન-મકાન-પ્લોટ કે ફલેટ ખરીદવાની જગ્યાએ ફીકસ રિર્ટન આપતી જગ્યાએ રોકાણ કરવાનું પસંદ કરી રહ્યાં છે. જેના પગલે શહેર અને જિલ્લાની 18 સબ રજિસ્ટાર ઓફિસમાં દસ્તાવેજ નોંધણીમાં સતત બે મહિના સુધી ઘટાડો જોવા મળ્યો હતો. બાદમાં જુલાઈનાં ઉછાળો આવ્યો હતો પરંતુ ઓગસ્ટમાં ફરી ઘટાડો થયો છે.
ઓગસ્ટ મહિનામાં સૌથી વધુ દસ્તાવેજ મોરબી રોડ કચેરી ખાતે નોંધાયા હતાં. મોરબી રોડ ખાતે 1590 ત્યારબાદ મવડી સબ રજિસ્ટાર અને રૈયા સબ રજિસ્ટાર ઓફિસમાં અનુક્રમે 1080 અને 867 દસ્તાવેજ નોંધાણા હતાં. ગોંડલ સબ રજિસ્ટાર ઓફિસ ખાતે 1015 દસ્તાવેજ નોંધાતા તે જિલ્લાની 18 સબરજિસ્ટાર ઓફિસમાંથી બીજા ક્રમે રહી હતી. જૂન મહિનામાં સૌથી વધુ દસ્તાવેજ મોરબી રોડ કચેરી ખાતે નોંધાયા હતાં. મોરબી રોડ કચેરી ખાતે કુલ 1677 દસ્તાવેજ નોંધાયા હતાં. જ્યારે બીજા નંબરે ગોંડલ સબ રજિસ્ટાર ઓફિસમાં 1159 દસ્તાવેજ નોંધાયા હતાં. જ્યારે ત્રીજા ક્રમે મવડી સબ રજિસ્ટારમાં 1056 ત્યારબાદ રૈયા સબ રજિસ્ટાર ઓફિસમાં 1008 દસ્તાવેજ નોંધાયા હતાં.