જન્માષ્ટમીના લોકમેળાની અત્યારથી જ તૈયારી, ટેન્ડર પ્રક્રિયા વહેલી કરાશે

નવા રેસકોર્ષના મેદાનના લેવલીંગ માટે સરકાર પાસે ગ્રાન્ટ મંગાશે

રાજકોટ સહિત સમગ્ર સૌરાષ્ટ્રના લોકપ્રિય એવા લોકમેળાને લઈને આ વખતે તંત્ર દ્વારા વહેલી તકે તૈયારીઓ શરૂૂ કરી દેવામાં આવી છે. ગત વર્ષે રાઈડ્સની મંજૂરીના વિવાદને કારણે મેળો રદ કરવો પડ્યો હતો, જેથી આ વર્ષે કોઈ મુશ્કેલી ન આવે તે માટે અગાઉથી જ પગલાં લેવામાં આવી રહ્યા છે.

જિલ્લા કલેક્ટર પ્રભવ જોષીએ જણાવ્યું હતું કે, ગત વર્ષના નિયમો જ આ વર્ષે પણ લાગુ પડશે. જોકે, આ વખતે રાઈડ્સ સંચાલકો સાથે વહેલી બેઠક યોજવામાં આવશે અને ટેન્ડર પ્રક્રિયા પણ વહેલી શરૂૂ કરવામાં આવશે. આનાથી રાઈડ્સ સંચાલકોને તૈયારી માટે પૂરતો સમય મળી રહેશે.

કલેક્ટરએ વધુમાં જણાવ્યું હતું કે, આ વખતે લોકમેળા માટે નવા રેસકોર્સના મેદાનને ફાઇનલ કરવામાં આવ્યું છે. આ મેદાનના લેવલિંગ સહિતની કામગીરી માટે સરકાર પાસે ટૂંક સમયમાં ગ્રાન્ટની માંગણી કરવામાં આવશે. જો આ કામગીરી સમયસર પૂર્ણ થશે, તો મેળો નવા રેસકોર્સ ખાતે જ યોજાશે. જો કામગીરી પૂરી નહીં થાય, તો મેળો જૂના રેસકોર્સ ખાતે જ યોજવામાં આવશે.