RTO ઇ-ચલણની ફાઇલ ખોલતા મોબાઇલ હેક, 3 લાખ ઉપડી ગયા

ઓનલાઇન છેતરપિંડીના બનાવોને લઇને પોલીસે નાગરિકોને સતર્ક અને જાગૃત બનવા અપીલ કરી

શહેરના યુવાન સાથે આર.ટી.ઓ. ઈ-ચલણનાં નામે રૂૂા. 3,05,716ની ઓનલાઈન છેતરપિંડી થઈ હોવાનો મામલો પોલીસ દફ્તરે નોંધાયો હતો.પોલીસ સૂત્રોએ વિગતો આપતાં જણાવ્યું હતું કે, ગાંધીધામમાં દવા વિતરક તરીકે નોકરી કરતા નવીનભાઈ કાનજીભાઈ સથવારાને વોટ્સ-એપ ઉપર આર.ટી.ઓ. ઈ-ચલણ 500.એ.પી.કે. નામની ફાઈલ આવી હતી, જેને ખોલતાંની સાથે તેમનો મોબાઈલ ફોન હેક થયો હતો. થોડી જ વારમાં તેમના બેંક ખાતામાંથી રૂૂા. 1.49 લાખ કપાયા હતા.

ભેજાબાજોએ મોબાઈલનું સંચાલન મેળવીને રૂૂા. 1,56,716ની લોન લઈને આ રકમ પણ ઉપાડી લીધી હતી. ગત તા. 25/4/2025ના સાંજના અરસામાં આ બનાવ બન્યો હતો. પોલીસે અજાણ્યા મોબાઈલ નંબરધારક સામે ગુનો નોંધીને વધુ તપાસ આરંભી છે. વધતા જતા ઓનલાઈન છેતરપિંડીના બનાવોને લઈને પોલીસે નાગરિકોને સતર્ક અને જાગૃત બનવા અપીલ કરી હતી.