સિરામિક એકમોના બાકીદારો સામે કેસ કરી કાયદેસરની પ્રક્રિયા કરાશે

મોરબીમાં હવે જે સિરામિક એકમોમાં નાણાં ફસાયેલા છે. તેની સામે કેસ કરી કાયદેસરની પ્રક્રિયા હાથ ધરવામાં આવશે. તેવો નિર્ણય સિરામિક રો-મટિરિયલ્સ એસોસિએશનની આજે મળેલી બેઠકમાં લેવામાં આવ્યો છે. આ નિર્ણયને એસોસિએશનના તમામ વેપારીઓએ વધાવ્યો છે.

મોરબી સિરામિક રો-મટિરિયલ્સ એસોસિએશનની આજે બેઠક મળી હતી. જેમાં અંદાજે સિરામિક એકમોને રો-મટિરિયલ્સ સપ્લાય કરતા અંદાજે 350 જેટલા વેપારીઓ ઉપસ્થિત રહ્યા હતા. સતિષભાઈ પટેલના જણાવ્યા અનુસાર આ બેઠકમાં ત્રણ મહત્વપૂર્ણ નિર્ણયો લેવામાં આવ્યા છે. જેમાં રો-મટિરિયલ્સના વેપારીના પૈસા જે સિરામિક એકમમાં ફસાયા છે. તેની સામે કેસ કરવામાં આવશે.

આ ઉપરાંત જે એકમોનું પેમેન્ટ આવતું નથી અને ચેક રિટર્ન થયા છે તેને માલની સપ્લાય બંધ કરવામાં આવશે. સાથે હવેથી સિરામિક એકમો સાથે પેમેન્ટ ટર્મ ફિક્સ કરીને જ માલ આપવાનો રહેશે. આ ત્રણ નિર્ણયોમાં તમામ વેપારીઓએ સહમતી દર્શાવી છે. જેથી હવે તેની અમલવારી કરવામાં આવશે. ઉલ્લેખનીય છે કે તાજેતરમાં જ કોરૂૂગેટેડ બોક્સ બનાવતા એકમોએ પણ તાજેતરમાં બેઠકો યોજી સિરામિક ઉદ્યોગો સાથે લાંબી ઉધારીવાળો ધંધો નહિ કરવાનો નિર્ણય લીધો હતો. ઉપરાંત લાંબા સમયથી પૈસા બાકી હોય તેમને બોક્સની સપ્લાય ન કરવાનો ઠરાવ કર્યો હતો.