નવાગામ દિવેલિયાપરામાં જૂની અદાવતનો ખાર રાખી યુવાન ઉપર છરી વડે હુમલો

• ‘બીજી વાર સામે મળ્યો તો જાનથી મારી નાખીશ’ તેવી ધમકી આપી

શહેરની ભાગોળે કુવાડવા રોડ પર આવેલા નવાગામ દિવેલીયાપરામાં જુની અદાવતનો ખાર રાખી પાડોશી શખ્સે છરી વડે હુમલો કરી જાનથી મારી નાખવાની ધમકી આપ્યાની ફરિયાદ પોલીસ ચોપડે નોંધાતાં કુવાડવા પોલીસે આરોપી વિરૂધ્ધ ગુનો નોંધી વધુ તપાસ હાથ ધરી છે.

જાણવા મળતી વિગત મુજબ નવાગામ આણંદપરમાં આવેલા દિવેલીયાપરામાં રહેતા ગણેશભાઈ રતાભાઈ મીર (ઉ.21) નામના યુવાને કુવાડવા રોડ પોલીસ મથકમાં નોંધાવેલી ફરિયાદમાં આરોપી તરીકે પાડોશમાં રહેતા લાધાભાઈ બચુભાઈ ડાભીનું નામ આપ્યું છે. ફરિયાદમાં જણાવ્યા મુજબ ગત રાત્રે તેઓ ઘરે હાજર હતાં ત્યારે જુની અદાવતનો ખાર રાખી પાડોશી શખ્સે ગાળો આપી ઢીકાપાટુનો માર માર્યો હતો. તથા નેફામાંથી છરી કાઢી છરી વડે હુમલો કરવા જતાં તેના પિતા રતાભાઈ વચ્ચે પડતાં દેકારો થતાં અન્ય લોકો દોડી આવ્યા હતાં. જેથી આરોપી છરી મુકી નાસી ગયો હતો. અને જતાં જતાં ‘બીજી વાર સામે મળ્યો તો જાનથી મારી નાખીશ.’ તેવી ધમકી આપી હતી. આ અંગે પોલીસે ગણેશભાઈની ફરિયાદ પરથી પાડોશી શખ્સ વિરૂધ્ધ મારામારી અને ધમકી આપ્યાનો ગુનો નોંધી વધુ તપાસ હાથ ધરી છે.