ધારાસભ્ય વિનોદભાઇ મોરડિયાના કાર્યાલયમાં આગ, વ્યાપક નુકસાની
- સુરતના સિંગણપોર વિસ્તારની ઘટના, આગનું કારણ શોર્ટ સર્કિટ
સુરતના સિંગણપોર વિસ્તારમાં ધારાસભ્ય વિનોદભાઈ મોરડીયાના કાર્યાલયમાં એસીમાં શોર્ટ સર્કીટ બાદ આગ લાગી હતી. આગ વિકરાળ બનતા બનાવની જાણ ફાયર વિભાગને કરવામાં આવી હતી. ફાયર વિભાગે ઘટના સ્થળે પહોંચીને આગ પર કાબુ મેળવી લીધો હતો. સદનસીબે આ ઘટનામાં કોઈ જાનહાની થવા પામી ન હતી પરંતુ આગના કારણે ફર્નીચર, કોમ્પ્યુટર સહિતનો સમાન બળી ગયો હોવાનું જાણવા મળ્યું હતું.
સિંગણપોર હેલ્થ સેન્ટર પાસે ધારાસભ્ય વિનોદભાઈ મોરડીયાનું કાર્યાલય આવેલું છે. કર્મચારીઓ કાર્યાલય ખાતે પહોંચ્યા હતા અને એસી શરુ કરતા શોર્ટ સર્કીટ થયા બાદ આગ લાગી હતી. આગ વિકરાળ બનતા ધુમાડાના ગોટેગોટા જોવા મળ્યા હતા. બીજી તરફ આગને લઈને ત્યાં અફરાતફરી મચી જવા પામી હતી. બનાવની જાણ ફાયર વિભાગને કરવામાં આવતા ફાયર વિભાગની ટીમ ઘટના સ્થળે પહોંચી હતી. સબ ફાયર ઓફિસર રમેશ સેલરે જણાવ્યું હતું કે, સિંગણપોર હેલ્થ સેન્ટર પાસે બીજા માળે આગ લાગી હોવાનો કોલ મળ્યો હતો. જેથી ઘટના સ્થળે પહોંચ્યા હતા સવારે ઓફીસ ખોલ્યા બાદ એસી શરુ કરતા તેમાં બ્લાસ્ટ થયો હતો. હાલ આગ પર કાબુ મેળવી લેવામાં આવ્યો છે. એસી, ફર્નીચર કોમ્યુટર હોવાથી આગ ઝડપથી પકડી લીધી હતી.