સૈનિક શાળા બાલાચડી દ્વારા ‘એક પેડ મા કે નામ’ અભિયાનનું આયોજન
‘એક પેડ મા કે નામ’ માતાઓના બિનશરતી પ્રેમ અને સંવર્ધનની ભાવનાનું પ્રતીક છે. જેમ એક વૃક્ષ છાંયડો, આશ્રય અને ભરણપોષણ પૂરું પાડે છે, તેમ એક માતા નિ:સ્વાર્થપણે તેના બાળકોને બધું જ આપે છે. તેમની વૃદ્ધિ અને ખીલવામાં મદદ કરે છે. માતૃત્વને એક વૃક્ષ સમર્પિત કરીને, અમે માતાઓ દ્વારા કરવામાં આવેલા અથાક પ્રયત્નો અને બલિદાનોનું સન્માન કરીએ છીએ, તેઓની આપણા જીવન પર ઊંડી અસરને સ્વીકારીએ છીએ.
જેમ એક વૃક્ષ ઋતુઓમાં ઊંચું રહે છે,તેમ માતાનો પ્રેમ અચળ રહે છે. માતા અને વૃક્ષના મહત્વને સ્વીકારવા માટે, સૈનિક સ્કૂલ બાલાચડીએ હાલ શાળાના કેમ્પસમાં ‘એક પેડ મા કે નામ’ વૃક્ષારોપણ અભિયાનનું આયોજન કર્યું હતું જેમાં અધિકારીઓ, સ્ટાફ, પરિવારો અને કેડેટ્સે વિવિધ સ્થળોએ વૃક્ષારોપણ કર્યું હતું. કેટલાક કેડેટ્સે તેમની માતાઓ સાથે આ વૃક્ષારોપણ અભિયાનમાં ભાગ લીધો હતો. આ કાર્યક્રમનું સંકલન પિયુષ વિરમગામા, ટીજીટી સાયન્સ દ્વારા કરવામાં આવ્યું હતું. આ પ્રસંગે કર્નલ શ્રેયશ મહેતા, આચાર્ય, સૈનિક શાળા બાલાચડીએ આ અભિયાનને સફળ બનાવવા માટે સામેલ થયેલા તમામને હાર્દિક અભિનંદન પાઠવ્યા હતા.