વિદેશ જવાનો મોહભંગ, ચાર મહિનામાં 600થી વધુ IELTS કોચિંગને તાળા!
ગુજરાતનો એક સમયે તેજીમાં રહેતો IELTS કોચિંગ ઉદ્યોગ અભૂતપૂર્વ પતનનો સામનો કરી રહ્યો છે, 2025 ના પ્રથમ ચાર મહિનામાં લગભગ 600 સેન્ટર બંધ થઈ ગયા છે. તેની સૌથી તીવ્ર અસર અમદાવાદમાં અનુભવાઈ છે.
ઉદ્યોગ સૂત્રોના જણાવ્યા અનુસાર, આ ઘટાડો કેનેડા, યુએસ, યુકે અને ઓસ્ટ્રેલિયા દ્વારા રજૂ કરાયેલા કડક વિઝા નિયમો સાથે સીધો જોડાયેલો છે. આંતરરાષ્ટ્રીય વિદ્યાર્થીઓના પ્રવેશ પર મર્યાદા લાદવાના કેનેડાના નિર્ણયની સૌથી નોંધપાત્ર અસર થઈ છે, જેના કારણે ગુજરાતમાંથી વિઝા અરજીઓમાં 41% ઘટાડો થયો છે. એકંદરે, રાજ્યમાંથી વિદેશી અભ્યાસ માટે વિદ્યાર્થીઓની અરજીઓમાં લગભગ 40% ઘટાડો થયો છે, જેનાથી IELTS કોચિંગની માંગમાં ભારે ઘટાડો થયો છે.
વિદ્યાર્થીઓના વર્તનમાં પરિવર્તનથી મંદીમાં બીજો સ્તર ઉમેરાયો છે. મોટી સંખ્યામાં વિદ્યાર્થીઓ હવે સ્વ-અભ્યાસ પસંદ કરે છે, ઢજ્ઞીઝીબય, મફત ઓનલાઈન સામગ્રી અને ડિજિટલ અભ્યાસક્રમો પર આધાર રાખે છે. ઘણા કોચિંગ સેન્ટરો સંપૂર્ણપણે ઓનલાઈન શિક્ષણ તરફ વળ્યા છે, જેના કારણે ભૌતિક વર્ગખંડો ખાલી થઈ ગયા છે.
નિષ્ણાતો કહે છે કે ભાષા-શિક્ષણ એપ્લિકેશનોનો ઉદય, અભ્યાસની આદતોમાં ફેરફાર અને વિઝા ચકાસણીમાં કડકતા આ બધાએ ઘટાડામાં ફાળો આપ્યો છે. જૂની ઇકોસિસ્ટમ, જ્યાં એજન્ટો IELTS ફી અને વિદેશી કોલેજ પ્રવેશ બંનેમાંથી કમિશન મેળવતા હતા, તેને પણ ફટકો પડ્યો છે.
જ્યારે નાના શહેરોમાં માંગ જોવા મળી રહી છે, મુખ્યત્વે કારણ કે ત્યાં ઘણા વિદ્યાર્થીઓ હજુ પણ માળખાગત કોચિંગ પર આધાર રાખે છે, ત્યારે અમદાવાદ, વડોદરા, સુરત અને રાજકોટ જેવા શહેરોમાં ઘટાડો જોવા મળી રહ્યો છે.
