બીજા લગ્ન કરનાર માતા સાથે વાતચીત કરતી દીકરીઓને કાકા-કાકીએ માર માર્યો

મારી નાખવાની ધમકી આપ્યાની ફરિયાદ નોંધાઈ

જામનગર શહેરના ગુલાબનગર વિસ્તારમાં રહેતી બે બહેનોએ બીજા લગ્ન કરનાર માતા સાથે સંબંધ રાખતાં ઉશ્કેરાયેલા કાકા-કાકી તેમજ પિતરાઈ ભાઈએ માર મારી જાનથી મારી નાખવાની ધમકી આપ્યાનો બનાવ પોલીસ દફતરે નોંધાયો છે.આ બનાવની વિગત એવી છે કે જામનગર શહેરના ગુલાબનગર વિસ્તારમાં આવેલી અલીશાહ પીરની દરગાહ પાસે રહેતી રજીયાબેન અફઝલભાઈ કુરેશીની માતા શેરબાનુએ આજથી ત્રણેક વર્ષ પૂર્વે લાલપુર ખાતે બીજા લગ્ન કરી લીધેલ હતા, અને તેણી સાથે રઝીયાબેન ફોન પર વાતચીત કરતી હતી, અને એક- બે વખત લાલપુર ખાતે મળવા પણ ગયા હતા. જે તેમના કાકા અસ્લમભાઈને ન્હોતું ગમતું અને કાકા- ભત્રીજી વચ્ચે આ બાબતનો અણબનાવ હતો.

દરમિયાન ગત તા. 8.10 ના રોજ જ્ઞાતિના આગેવાન ઈમરાનભાઈ પટેલ તેણીના ઘરે આવી કાકા-ભત્રીજી વચ્ચે અણબનાવ દૂર કરી સમાધાનની વાત કરતાં બંને બહેનો ઈમરાનભાઈ સાથે તેના કાકા અસ્લમભાઈના ઘરે ગયેલ ત્યાં કાકાએ કહેલ કે તારે તારી માતા સાથે સંબંધ રાખવો છે કે તારા પિતા સાથે, તેમ કહેતા તેણીએ બંને સાથે સંબંધ રાખવાની વાત કરતાં ઉશ્કેરાયેલા કાકા અસ્લમભાઈ, કાકી યાસ્મીનબેન અને તેનો દિકરો ઈનાયત ત્રણેય જણાઓએ ઢીકાપાટુનો માર મારી કાકાએ આજ પછી તારા માતા સાથે કોઈ પણ જાતના સંબંધ રાખીશ તો તને જાનથી મારી નાખીશ તેવી ધમકી આપતાં તેણીએ કાકા અસ્લમભાઈ, કાકી યાસ્મીનબાનું અને ભાઈ ઈનાયત વિરૂૂધ્ધ સિટી બી. ડીવીઝન પોલીસ મથકમાં ફરિયાદ નોંધાવતાં પોલીસે વધુ તપાસ હાથ ધરી છે.