સાંપ્રદાયિક વિભાજન કરી મૂળ મુદ્દાઓ પરથી ધ્યાન હટાવાઈ રહ્યું છે

નેહરુ-પટેલ વિભાજીત હોવાનું સ્થાપિત કરવા અને રાષ્ટ્રીય નાયકો અંગે ષડયંત્રો ચાલી રહ્યા છે: કોંગ્રેસ અધ્યક્ષ ખડગેનો આરોપ

અમદાવાદમાં સાબરમતિના તટે ચાલી રહેલ કોંગ્રેસના રાષ્ટ્રીય અધિવેશનમાં ગઈકાલે ગાંધીજી અને સરદાર પટેલની વિચારધારાને વળગી રહેવાના સંકલ્પ બાદ આજે બીજા દિવસે વિવિધ ઠરાવો પાસ કરવામાં આવ્યા હતાં.
ગઈકાલે પ્રથમ દિવસે કોંગ્રેસ અધ્યક્ષ ખડગેએ પોતાના સંબોધનમાં કહ્યું કે કોંગ્રેસ પાર્ટી બંધારણ અને બંધારણના નિર્માતા બંનેનું સન્માન કરે છે અને તેનું રક્ષણ કેવી રીતે કરવું તે જાણે છે. સરદાર પટેલ આપણા હૃદય અને વિચારોમાં જીવે છે અને આપણે તેમના વારસાને આગળ ધપાવીએ છીએ. આ વિચારને ધ્યાનમાં રાખીને, અમે અમદાવાદના સરદાર પટેલ મ્યુઝિયમ ખાતે CWC બેઠકનું આયોજન કર્યું છે. સરદાર પટેલને આપણે હૃદયપૂર્વક શ્રદ્ધાંજલિ આપીએ છીએ.

તેમણે કહ્યું, આજે ભાજપ અને આરએસએસ ગાંધીજી સાથે સંકળાયેલી સંસ્થાઓ પર કબજો કરી રહ્યા છે અને તેમને તેમના વૈચારિક વિરોધીઓને સોંપી રહ્યા છે. ખડગેએ વારાણસીમાં સર્વ સેવા સંઘ અને ગુજરાત વિદ્યાપીઠના ઉદાહરણો આપ્યા અને દાવો કર્યો કે ગાંધીવાદી લોકો અને સહકારી ચળવળના લોકોને હાંસિયામાં ધકેલી દેવામાં આવી રહ્યા છે. આવી વિચારસરણી ધરાવતા લોકો ગાંધીજીના ચશ્મા અને લાકડી ચોરી શકે છે, પરંતુ તેમના આદર્શોને ક્યારેય અનુસરી શકતા નથી. કોંગ્રેસ પાર્ટી પાસે ગાંધીજીનો વૈચારિક વારસો છે.

કોંગ્રેસ પ્રમુખ ખડગેએ વધુમાં કહ્યું, ગુજરાત એ ટોચનું રાજ્ય છે જ્યાં કોંગ્રેસે સૌથી વધુ તાકાત મેળવી છે. આજે આપણે ફરીથી પ્રેરણા અને શક્તિ લેવા માટે અહીં આવ્યા છીએ. તેમણે કહ્યું કે આપણી વાસ્તવિક તાકાત દેશની એકતા, અખંડિતતા અને સામાજિક ન્યાયની વિચારધારા છે. આજે, આ વિચારધારાને આગળ વધારવા માટે, આપણે પહેલા પોતાને મજબૂત બનાવવા અને આપણા સંગઠનને મજબૂત બનાવવા જરૂૂરી છે.

ખડગેએ કહ્યું, આજે દેશમાં સાંપ્રદાયિક વિભાજન બનાવીને મૂળભૂત મુદ્દાઓ પરથી ધ્યાન હટાવવામાં આવી રહ્યું છે. બીજી તરફ, ભદ્ર વર્ગ દેશના સંસાધનો કબજે કરીને શાસનને નિયંત્રિત કરવાના માર્ગ પર છે. કોંગ્રેસ અધ્યક્ષે વધુમાં કહ્યું કે દેશમાં ઘણા રાષ્ટ્રીય નાયકો અંગે ષડયંત્ર ચાલી રહ્યું છે, જેમાં ભૂતપૂર્વ વડાપ્રધાન જવાહરલાલ નેહરુ અને સરદાર વલ્લભભાઈ પટેલ વચ્ચેના દ્વિપક્ષીય સંબંધોનો પણ સમાવેશ થાય છે.

ખડગેએ કહ્યું, મિત્રો, છેલ્લા ઘણા વર્ષોથી ઘણા રાષ્ટ્રીય નાયકો વિરુદ્ધ એક સુનિયોજિત ષડયંત્ર રચવામાં આવી રહ્યું છે. કોંગ્રેસ પાર્ટી વિરુદ્ધ વાતાવરણ બનાવવામાં આવી રહ્યું છે, જેનો 140 વર્ષથી દેશની સેવા કરવાનો અને લડવાનો ગૌરવશાળી ઇતિહાસ છે. આ કામ એવા લોકો કરી રહ્યા છે જેમની પાસે પોતાની સિદ્ધિઓ બતાવવા માટે કંઈ નથી. સ્વતંત્રતા સંગ્રામમાં તેમનું યોગદાન બતાવવા માટે તેમની પાસે કંઈ નથી. કોંગ્રેસ અધ્યક્ષે ભાજપ પર પ્રહાર કરતા કહ્યું કે તે એવું બતાવવાનું કાવતરું કરી રહ્યું છે કે નેહરુ અને પટેલ એકબીજાના વિરોધી હતા, જ્યારે તેનાથી વિપરીત, બંને નેતાઓ વચ્ચે સારા સંબંધો હતા.

તેમણે કહ્યું, તેઓ સરદાર પટેલ અને પંડિત નેહરુ વચ્ચેના સંબંધોને એવી રીતે દર્શાવવાનું કાવતરું ઘડે છે કે જાણે બે નાયકો એકબીજાના વિરોધી હોય. જ્યારે સત્ય એ છે કે તેઓ એક જ સિક્કાની બે બાજુ હતા. ઘણી ઘટનાઓ અને દસ્તાવેજો તેમના સૌહાર્દપૂર્ણ સંબંધોની સાક્ષી આપે છે.

દલિત-મુસ્લિમ-બ્રાહ્મણો પર ધ્યાન આપવામાં OBC ભુલાયા: રાહુલ
અમદાવાદમાં મળેલી કોંગ્રેસની રાષ્ટ્રીય કાર્યકારિણીમાં રાહુલ ગાંધીએ કોંગ્રેસની રણનીતિ પર મોટી ટિપ્પણી કરી. રાહુલે કહ્યુ કે પાર્ટી દલિત, મુસ્લિમ અને બ્રાહ્મણો પર ધ્યાન કેન્દ્રીત કરવામાં રહી ગઈ. જેના પરિણામ સ્વરૂપે ઓબીસી સમુદાયે અમારો સાથ છોડી દીધો. રાહુલ ગાંધીએ સંસદમાં જ પીએમ મોદી અને અમિત શાહને ચેલેન્જ આપી હતી કે તમે લખી રાખો અમે ગુજરાતમાં જ તમને હરાવીશુ. જો કે અગાઉની ગુજરાત મુલાકાત દરમિયાન રાહુલે એ વાતનો પણ સ્વીકાર કર્યો હતો કે તેના અડધાથી વધુ કાર્યકર્તાઓ ભાજપ સાથે મળેલા છે.

ચિદમ્બરમ અચાનક બેભાન થઈ જતાં હોસ્પિટલમાં ખસેડાયા

કોંગ્રેસના અધિવેશનની ઈવેન્ટમાં એક કાર્યક્રમ દરમિયાન પ્રાર્થના સભામાં પી. ચિદમ્બરમની તબિયત બગડી હોવાની માહિતી મળી રહી છે. રાજ્યસભા સાંસદ પી. ચિદમ્બરમ સાબરમતી આશ્રમમાં ગરમીને કારણે બેભાન થઈ ગયા હતા. ત્યારબાદ તાત્કાલિક તેમને ઝાયડસ હોસ્પિટલમાં દાખલ કરવામાં આવ્યા છે. જ્યાં તેમની તબિયત સુધારા પર જણાય છે. ચિદમ્બરમને દાખલ કરાયા બાદ રાજ્યના આરોય સચિવ રૂષિકેશ પટેલે પણ હોસ્પિટલે દોડી જઈ તેમના ખબર અંતર પુછ્યા હતાં. અમદાવાદ શહેરમાં સાબરમતી વિસ્તારમાં આવેલા ગાંધી આશ્રમમાં કાર્યક્રમ દરમિયાન તેઓ 12મી લાઈનમાં બેઠા હતા. જો કે, તેમની તબિયત અચાનક લથડતાં સભામાં ચિંતાનો માહોલ સર્જાયો હતો.