સાંજે દિલ્હીમાં ભાજપની બેઠક, મુખ્યમંત્રી અને પાટીલને તેડું

• લોકસભાના ચાર અને ધારાસભાના પાંચ ઉમેદવારોના નામ થશે નક્કી

લોકસભાની ચૂંટણી જાહેર થયા પહેલા ભાજપ દ્વારા ગુજરાતની 26 પૈકી 22 બેઠકોના ઉમેદવારોના નામો જાહેર કરી દેવામાં આવ્યા હતાં ત્યારે મહેસાણા, અમરેલી, જૂનાગઢ અને સુરેન્દ્રનગર લોકસભા બેઠકોના તેમજ વિજાપુર, પોરબંદર, બાયડ, વાઘોડીયા તથા માણાવદર ધારાસભાની પેટા ચૂંટણીના ઉમેદવારો આજે દિલ્હી ખાતે યોજીાનાર ભાજપની કેન્દ્રીય ચૂંટણી સમિતિની બેઠકમાં નક્કી થનાર છે અને મોડીરાત્રે અથવા આવતીકાલ સુધીમાં ઉમેદવારોના નામની જાહેરાત કરી દેવામાં આવે તેવી શકયતા છે.

આજે ભાજપની કેન્દ્રીય ચૂંટણી સમિતિની બેઠકના પગલે ફરી એક વખત મુખ્ય મંત્રી ભૂપેન્દ્રભાઈ પટેલ અને ભાજપના પ્રદેશ પ્રમુખ સી.આર.પાટીલને દિલ્હીનું તેડુ આવતાં બન્ને નેતાઓ દિલ્હી પહોંચ્યા છે.
બીજી તરફ કોંગ્રેસ અને આમ આદમી પાર્ટીનું ગઠબંધન હજુ સુધી 26માંથી માત્ર 9 બેઠકોના ઉમેદવારો જાહેર કરી શકેલ છે ત્યારે આ અઠવાડિયામાં જ કોંગ્રેસના બાકીના ઉમેદવારો પણ જાહેર કરવામાં આવનાર છે. આમ આદમી પાર્ટીએ તેના ભાગની ભાવનગર અને ભરૂચ બેઠકનાં ઉમેદવારો જાહેર કરી ચુકી છે. જ્યારે કોંગ્રેસે સાત ઉમેદવારો જાહેર કર્યા છે અને 17 ઉમેદવારો જાહેર કરવાના બાકી છે.