વાંકાનેરના ચંદ્રપુર પાસે સાઇકલ ચાલકને ટ્રક ડ્રાઇવરે કચડી નાખ્યો

કામેથી ઘરે ફરતા યુવકને નડયો અકસ્માત; પરિવાર શોકમાં ગરકાવ

વાંકાનેરના કેરાળા ગામે રહેતો યુવાન વાંકાનેરમાં ઘર કામ કરી સાયકલ લઇ ઘરે પરત ફરી રહ્યો હતો. ત્યારે ચંદ્રપુર ગામ પાસે ટ્રક ચાલકે સાયકલને ઠોકરે ચડાવતા સાયકલ ચાલક યુવાન ટ્રકના જોટામાં આવી જતા ઘટના સ્થળે જ કરુણ મોત નીપજયુ હતું. યુવકના મોતથી પરિવારમાં માતમ છવાયો છે.

આ બનાવ અંગે પોલીસમાંથી જાણવા મળતી વિગત મુજબ વાંકાનેર તાલુકાના કેરાળા ગામે રહેતો અકબર સુલેમાનભાઈ રતનીયા નામનો 25 વર્ષનો યુવાન સાયકલ લઈને ચંદ્રપુર ગામ પાસેથી પસાર થઈ રહ્યો હતો. ત્યારે ટ્રકચાલકે સાયકલને ઠોકરે ચડાવતા સાયકલ ચાલક અકબર રતનીયા ફંગોળાઈને ટ્રકના જોટા નીચે આવી ગયો હતો. સાયકલ ચાલક યુવકને ટ્રક ચાલકે કચડી નાખતા ઘટના સ્થળે જ કમકમાટી ભર્યું મોત નીપજ્યું હતું. યુવકના મોતથી પરિવારમાં શોકની લાગણી પ્રસરી છે. ઘટના અંગે જાણ થતા વાકાનેર પોલીસ તાત્કાલિક ઘટના સ્થળે દોડી ગઈ હતી અને પોલીસે જરૂૂરથી કાર્યવાહી કરી યુવકના મૃતદેહને પોસ્ટ મોર્ટમ માટે રાજકોટ સિવિલ હોસ્પિટલ ખાતે ખસેડ્યો હતો. આ બનાવ અંગે વાંકાનેર પોલીસે નોંધ કરી વધુ તપાસ હાથ ધરી છે.