નાની બહેન સાથે ઝઘડો કરતી કોલેજિયન યુવતીને પિતાએ ફડાકો મારતા ફિનાઇલ પી લીધું

શહેરમાં સાધુ વાસવાણી રોડ ઉપર નટરાજનગરમાં નાની બહેન સાથે ઝઘડો કરતી કોલેજીયન યુવતીને પિતાએ ફડાકો મારી દેતા યુવતીને માઠુ લાગી આવતા ફીનાઈલ પી લીધું હતું. યુવતીને તાત્કાલિક સારવાર માટે સિવિલ હોસ્પિટલમાં ખસેડવામાં આવી હતી.

આ બનાવ અંગે પોલીસમાંથી જાણવા મળતી વિગત મુજબમાં સાધુ વાસવાણી રોડ ઉપર નટરાજનગરમાં આરએમસીના ક્વાર્ટરમાં રહેતી સાનિયાબેન અજયભાઈ રાજભર નામની યુવતી પોતાના ઘરે હતી ત્યારે રાત્રિના સાડા આઠેક વાગ્યાના અરસામાં ફિનાઈલ પી લીધું હતું. સાનિયાબેન રાજભરને ઝેરી અસર થતા તાત્કાલિક સારવાર માટે સિવિલ હોસ્પિટલમાં દાખલ કરવામાં આવી હતી. પ્રાથમિક પૂછપરછમાં સાનિયાબેન રાજભર મૂળ ઉત્તર પ્રદેશની વતની છે અને તેના પિતા છેલ્લા 15 વર્ષથી અહીંયા કલરકામની મજૂરી કરી પરિવારનું ગુજરાન ચલાવે છે અને સાનિયાબેન રાજભર કોલેજમાં અભ્યાસ કરે છે સાનિયાબેન રાજપર તેની નાની બહેન સાથે ઝઘડો કરતી હતી ત્યારે પિતાએ ફડાકો મારતા તેણીને માઠું લાગી આવતા ફિનાઈલ પી લીધું હોવાનું જાણવા મળ્યું છે.

આ ઉપરાંત અન્ય બીજા બનાવમાં ભગવતીપરા દરબારવાડી શેરીમાં રહેતા રણજીતસિંહ ખોટુભા જાડેજા (ઉ.વ.65) રાત્રીના પોતાના ઘરે હતા ત્યારે હિતેષ, મયુર અને તેની સાથેના અજાણ્યા શખ્સે ઝધડો કરી તલવાર-ધોકા વડે માર મારતાં માથે તેમજ શરીરે ઈજા થતાં તાત્કાલિક સારવાર અર્થે સિવિલ હોસ્પિટલમાં ખસેડાયા હતા. જ્યારે રૈયાધાર વિસ્તારમાં રહેતા કાળુ રતુભાઈ દેત્રોજા નામનો 20 વર્ષનો યુવાન પોતાના ઘર પાસે હતો ત્યારે અમર સહિતના શખ્સોએ ઝઘડો કરી ધોકા વડે માર માર્યો હતો. યુવકને ઈજા પહોંચતા સારવાર માટે સિવિલ હોસ્પિટલમાં દાખલ કરાયો હતો. ઉપરોક્ત બનાવ અંગે પોલીસને નોંધ કરી વધુ તપાસ હાથ ધરી છે.