કોઠારિયા સોલવન્ટમાંથી ક્રેટા કારમાં 300 લીટર દેશી દારૂ લઇ નીકળેલા બે ઝડપાયા

6 હજારનો દારૂ, કાર અને મોબાઇલ મળી રૂા.10.11 લાખનો મુદ્દામાલ કબજે

શહેરની ભાગોળે ગોંડલ રોડ પર આવેલા કોઠારીયા સોલવન્ટમાંથી ક્રેટા કાર દેશી દારૂ લઇ નીકળેલા બે શખ્સોને પોલીસે ઝડપી લઇ 300 લીટર દેશી દારૂ કાર અને મોબાઇલ મળી કુલ રૂા.10.11 લાખનો મુદામાલ કબજે કરી ધોરણસરની કાર્યવાહી હાથ ધરી છે.

જાણવા મળતી વિગત મુજબ ક્રાઇમ બ્રાન્ચના એએસઆઇ હરદેવસિંહ જાડેજા સહીતનો સ્ટાફ પેટ્રોલીંગમાં હતો દરમિયાન સોલવન્ટમાં રહેતો સંજય સુરેશ જીંજરીયા નંબર પ્લેટ વગરની ક્રેટા કારમાં દેશી દારૂ ભરી બહારગામથી લઇને આવતો હોવાની બાતમી મળતા પોલીસે વોચ ગોઠવી ત્યાથી પસાર થતી કારને અટકાવી તલાશી લેતા તેમાંથી દેશી દારૂ લીટર 300 (કિં.6000) મળી આવ્યો હતો. જેથી પોલીસે દારૂ કાર અને મોબાઇલ મળી કુલ રૂા.10,11,000નો મુદામાલ કબજે કરી આરોપી સંજય સુરેશભાઇ જીંજરીયા અને કમલેશ હરેશભાઇ મોદીને ઝડપી લઇ ધોરણસરની કાર્યવાહી હાથ ધરી છે.