માનસરોવર પાર્ક પાસે બેકરીમાં તોડફોડ કરી વેપારી પર હુમલો કરનાર ત્રણ ઝડપાયા

કેકના પૈસા મામલે માથાકૂટ કરી હતી: પોલીસે સીસીટીવી ફૂટેજને આધારે પકડી કાયદાનું ભાન કરાવ્યું

આજી ડેમ ચોકડી પાસે માનસરોવર પાર્ક મેઈન રોડ પર સમ્રાટ બેકરી અને સમ્રાટ પાન નામે દુકાન ચલાવતા રવિરાજસિંહ અશોકસિંહ ઝાલા (ઉ.વ.26, રહે.બાલકૃષ્ણ સોસાયટી શેરી નં.8, સંત કબીર રોડ)ની બેકરીએ જઈ ત્રણ અજાણ્યા લુખ્ખાઓએ કેકના પૈસા બાબતે હુમલો કરી ધોકાથી બેકરીમાં રાખેલ ડિસ્પ્લે ફ્રિઝ અને નાનું ચોકલેટ ફ્રિઝ તોડી 4 હજારનું નુકસાન કર્યાની આજી ડેમ પોલીસ મથકમાં ફરિયાદ નોંધાઈ છે.

રવિરાજસિંહે પોલીસને ફરિયાદમાં જણાવ્યું કે,તે સમ્રાટ બેકરી સાથે નજીક સમ્રાટ પાન નામે દુકાન પણ ચલાવે છે.બુધવારે બપોરે તે પાનની દુકાને હતા ત્યારે તેની બેકરી કે જયાં તેના કારીગર ગુલામ હુસૈન કામ કરતો હતો ત્યાં અજાણ્યો શખ્સ કેક લેવા ગયો હતો. જયા પૈસા બાબતે બને વચ્ચે ઝઘડો થતા તે બેકરીએ ગયા હતા. આ સમયે તે શખ્સ તેની સાથે પણ ગાળો દઈ બોલાચાલી કરવા લાગ્યા બાદ ત્યાંથી ભાગી ગયો હતો.

થોડી વાર બાદ તે શખ્સ અન્ય બે અજાણ્યા શખ્સો કે જેની હાથમાં લાકડાના ધોકા હતા તેની સાથે ઘસી આવ્યો હતો અને ત્રણેય બેકરીમાં ધોકાથી તોડફોડ કરવા લાગ્યા હતા. આથી તે વચ્ચે પડતા તેને પણ ગાળો દઈ ધોકાથી હુમલો કરતા ઈજા થઈ હતી. લોકો એકઠા થઈ જતા ત્રણેય શખ્સો ત્યાંથી ભાગી ગયા હતા. હાલ આજી ડેમ પોલીસે ગુનો દાખલ કરી ત્રણેય શખ્સોની શોધખોળ શરૂૂ કરી હતી. તેવામાં આજી ડેમ પોલીસના પીઆઇ એ.બી. જાડેજા અને ટીમે બેકરીના સીસીટીવી ફુટેજને આધારે ત્રણેયને ઝડપી લીધા હતા અને કાયદાનું ભાન કરાવ્યું હતું.