રાજકોટના NRI મહિલાની કિંમતી જમીન પચાવી પાડવાનું કૌભાંડ

વેરાવળ પાસેની જમીનનો ઓરિજિનલ દસ્તાવેજ ભત્રીજાને આપ્યો હતો: અમેરિકા રહેતા મહિલાની ફરિયાદ: ખોટી પાવર ઓફ એટર્ની બનાવી ભત્રીજા સહિત સાત લોકોએ કાવતરું કરી બોગસ દસ્તાવેજ બનાવી જમીન વેચી મારી

રાજકોટમાં મવડી ફાયર બ્રિગેડની ઓફીસ પાસે પાવન કોમ્પ્લેક્ષમાં મકાન ધરાવતા અને હાલ અમેરિકા સ્થાયી થયેલા સ્મિતાબેન વા/ઓ દિલીપભાઇ પારેખ(જૈન)(ઉવ.63)ની શાપર પાસે વેરાવળમાં આવેલી કરોડોની કિંમતી જમીન તેમના ભત્રીજા અને ભત્રીજી સહિત સાત શખ્સોએ બોગસ દસ્તાવેજ ઉભા કરી પચાવી પાડ્યાની શાપર વેરાવળ પોલીસમાં ફરિયાદ નોંધાઈ છે.આ ઘટનામાં પીઆઇ આર.બી.રાણા તપાસ ચલાવી રહ્યા છે.

સ્મિતાબેને ફરિયાદમાં જણાવ્યું હતું કે,મારો દીકરો અંશ એમ છેલ્લા 30 વર્ષથી અમેરીકા ખાતે રહુ છુ અને અમેરીકાની નાગરીકતા ધરાવુ છુ હું એકાદ બે વર્ષે ભારત મારા સગા વહાલાને મળવા તેમજ કામ સબબ આવુ છુ મારા પતિ દીલીપભાઈ મોહનલાલ પારેખ નુ તા.01/01/2023 ના રોજ અવસાન થયેલ છે.સને-1995 મા હું તથા મારા પતિ અમેરીકા ખાતે રહેતા હતા અને ભારત માં રાજકોટ ખાતે આવેલ ત્યારે તા.11/08/1995 ના રોજ મે શામજીભાઈ ગોવિંદભાઇ પટેલ નાઓ પાસેથી રાજકોટ જીલ્લાના કોટડાસાંગાણી તાલુકાના વેરાવળ ગામે એસ,આઈ.ડી.સી મેઇન રોડ શાંતિધામ ગેઇટ નં 2 ની સામે ના રેવન્યુ સર્વે નંબર 166 પૈકીના બીન ખેડવાણની મંજુરી વાળા સબપ્લોટ નંબર 6/9-એ તથા 6/9-બી તથા 9/ઇ મુજબના કુલ 1483.67 ચોરસ મીટર ( 1774.46 ચોરસવાર ) વાળા કુલ-3 પ્લોટ કિંમત રૂૂપિયા 51,928/- મા ખરીદ કરેલ હતા જેનો સબ રજીસ્ટાર કચેરી ગોં ડલ ખાતે દસ્તાવેજ અનુક્રમ નંબર 3176 તા.11/08/1995 થી રજીસ્ટર દસ્તાવેજ કરાવ્યો હતો.જે અસલ દસ્તાવેજની ફાઇલ મે મારા જેઠના દિકરા ઘર્મેશભાઇ હિરાભાઈ પારેખ રહે.રાજકોટ મવડી પ્લોટ કૃષ્ણ નગર શેરી નં 3 સ્વામીનારાયણ ચોક વાળાને સાચવીને રાખવા માટે આપેલ હતી.

બાદ હું તથા મારા પતિ અમેરીકા જતા રહેલ હતા અને સને 2013-2014 માં ભારત થી મારા જેઠ કનુભાઇ મોહનલાલ પારેખ નો મને ફોન આવેલ અને કહેલ કે પ્રકાશભાઈ દેલવાડીયાએ મને વાત કરેલ કે વેરાવળ (શાપર) ખાતે સ્મીતાબેનના નામના પ્લોટ મે વેચાતા લીધા છે.પરંતુ સમયગાળા દરમ્યાન હું તથા મારા પતિ અમેરીકા ખાતે હોય અને ઉપરોકત પ્લોટનો મારા નામનો જ દસ્તાવેજ હોય જેથી મારી હાજરી વગર પ્લોટ વેચાણ ની વાત થતા જેથી મને શંકા લાગતા સને 2015-2016 માં હું અમેરીકા થી રાજકોટ ખાતે આવેલ અને ગોંડલ સબ રજીસ્ટ્રાર કચેરી ખાતેથી માહિતી મેળવતા જાણવા મળેલ કે હું અમેરીકા ખાતે હોય અને મારી ગેરહાજરીમાં મારા જેઠના દીકરા ઘર્મેશ હીરાલાલ પારેખ તથા તેની બહેન હેતલબેન વિપુલભાઇ શાહ (રહે.રાજકોટ ગોપાલનગર-9, ઢોલરીયા નગર-6 શ્રી વિઠલ કાળીદાસ મહેતા બોડીંગની સામે) તથા દિલીપભાઈ શાંતિલાલ ભુત, જયેશભાઇ શાંતિલાલ ભુત, શાંતિલાલ નાથાલાલ ભુત (રહે. વેરાવળ (શાપર) અ મર વે બ્રીઝ વાળી શેરી ખોડીયાર મોટર ગેરેજની સામે),પ્રકાશભાઇ પ્રેમજીભાઈ દેલવાડીયા (રહે.મવડી ધ લી ફ એપાર્ટમેન્ટ બ્લોક નં એ-102 સ્પીડવેલ પાર્ટી પ્લોટ પાસે) અને જસમતભાઈ ડી. સાંગાણી રહે.શાપર (વેરાવળ) વાળા ઓએ પુર્વયોજીત કાવતરૂૂ રચી અસલ દસ્તાવેજના આઘારે વેરાવળ ખાતે આવેલ પ્લોટમા વેંચનાર તરીકે ધર્મેશ પારેખે ખોટી સહીઓ તથા અંગુઠાનુ નિશાન કરી તેમજ અસલ દસ્તાવેજમાં મારી ભત્રીજી હેતલબેન વિપુલભાઇ શાહે દસ્તાવેજમા મારા ફોટાની જગ્યાએ પોતાનો ફોટો ચોંટાડી દસ્તાવેજ સમયે મારી ખોટી ઓળખ આપી સબ રજીસ્ટ્રાર કચેરી ગોંડલ ખાતે હાજર રહી તથા હકીકતે વેચનાર વ્યકતિ પ્લોટના મુળ માલીક નહી હોવાનુ જાણવા છતા જમીન ઓછી કીંમતે મેળવવા સારૂૂ દિલીપ શાંતિલાલ ભુત તથા જયેશ શાંતિલાલ ભુત (સ્વસ્તીક મેટલના ભાગીદારો) એ આ પ્લોટના દસ્તાવેજ માં સહીઓ કરી જમીન ખરીદ કરી દસ્તાવેજ વખતે તેમાં શાંતિલાલ નાથાભાઇ ભુત,પ્રકાશભાઇ પ્રેમજીભાઈ દેલવાડીયા,જસમતભાઈ ડી. સાંગાણીએ ખોટી ઓળખ આપી દસ્તાવેજમાં ખોટી સાક્ષી તરીકે સહિ કરી ગોંડલ સબ રજીસ્ટાર કચેરી ખાતે બોગસ દસ્તાવેજ કરાવી લીધાનુ જાણવા મળેલ છે.

તેમજ જેઠના દીકરા ઘર્મેશભાઇ હિરાભાઇ પારેખએ ખોટી પાવર ઓફ એટર્ની બનાવી લઇ તેના આધારે ક્રિષ્ના બરન ગુપ્તા (રહે.વેરાવળ શાંતિધામ સોસાયટી વાળા)ને તા.09/05/2007 ના રોજ સબ-રજીસ્ટાર કચેરી ગોંડલ ખાતે રજીસ્ટર વેંચાણ દસ્તાવેજ કરી દીઘેલ છે બાદ મારા પતિનુ અવસાન થઇ ગયેલ હોય આ ઉપરોકત વ્યકિતઓ પૈકી જસમતભાઈ સાંગાણી સીવાયના તમામ લોકોને મળી આ બાબતે પૂછતા તેઓ એ જે તે સમયે આ દસ્તાવેજ કરી આપ્યો હતો.આ મામલે સ્મિતાબેને સાપર વેરાવળ પોલીસમાં ફરિયાદ નોંધાઈ હતી.