મવડી ચોકડીએ મજૂરીના પૈસા આપવાની ના પાડી ત્રણ ભાઈઓ પર ચારનો હુમલો

ત્રણેય ભાઈઓને મવડી ચોકડી પાસે બોલાવી ચારેય તૂટી પડ્યા, ફરિયાદ નોંધાઈ

શહેરના મવડી ચોકડી પાસે ત્રણ પર પ્રાંતિય ભાઈઓને મજુરીના પૈસા આપવાની ના પાડી ચાર શખ્સોએ ઢીકાપાટુનો માર માર્યો હતો. એન ફરિયાદી યુવાનને માથામાં હથોડીનો ઘા ઝીંકી દેતા તેને લોહી લુહાણ હાલતમાં હોસ્પિટલ ખસેડાયો હતો. આ મામલે પોલીસમાં ચાર શખ્સો સામે ફરિયાદ નોંધાઈ હતી.

બનાવની વિગતો અનુસાર મુળ ઉત્તરપ્રદેશના અને હાલ 150 ફૂટ રીંગ રોડ ફોર્ચ્યુન હોટેલની પાછળ સરસ્વતી નગર શેરી નં. 15માં રહેતા પયોગેન્દ્ર રામ સોચરામ કુમાર (ઉ.વ.24)એ તેમના શેઠ સોનુંભાઈ અમરનાથ રામ, સાધુ, દિપકભાઈ અને દેવેન્દ્રનું નામ આપતા તેમની સામે ફરિયાદ નોંધવામાં આવી છે.

યોગેન્દ્રએ ફરિયાદમાં જણાવ્યું હતું કે, ગઈ તા. 10ના રોજ રાત્રીના ત્રણેય ભાઈ ઘરેથી ચાલીને રામાપીર ચોકડી ખાતે સબંધીના ઘરે જતા હતા ત્યારે મવડીના ઓમનગર ધરમનગર શેરી નં. 4 માં રહેતા તેમના શેઠ સોનુભાઈ રામે ભાઈ સચીનાનેદને કોલ કરી મવડી ચોકડીએ હીસાબના પૈસા લેવા માટે બોલાવ્યા હતાં. જેથી ત્રણેય ભાઈ મવડી ચોકડીએ પહોંચતા ત્યાં સોનું તેમજ તેમની સાથેના ત્રણ મજુરો સાથે હતા તેઓએ પૈસા આપવાની ના પાડી ઢીકાપાટુનો માર માર્યો હતો. તેમજ આરોપી સાધુએ યોગેન્દ્રને માથામાં હથોડી મારી દેતા તેમને માથામાંથી લોહી નિકળવા લાગ્યું હતું. અને દેકારો થઈ જતાં તેઓ ત્યાંથી ભાગી ગયા હતા અને મામલે 108 મારફતે યોગેન્દ્રને સિવિલ હોસ્પિટલે ખસેડવામાં આવ્યો હતો. આ અંગે પોલીસમાં ફરિયાદ નોંધવામાં આવતા આરોપીની શોધખોળ શરૂ કરી છે.