કેરાલાનાં કરોડોના ફ્રોડનો રેલો રાજકોટમાં, ત્રણ શખ્સો ઝડપાયા

સ્થાનિક ક્રાઈમ બ્રાંચને સાથે રાખી કેરાલા પોલીસનાં મવડી પ્લોટ અને પરસાણાનગરમાં દરોડા

સફાઈ કામદાર સહિતના લોકોના બેંક ખાતાઓમાં લાખો રૂપિયા જમા થયાનું ખુલ્યું

કેરાલામાં થયેલા કરોડોના સાયબર ફ્રોડ મામલે તપાસમાં રાજકોટનું કનેકશન બહાર આવતાં કેરાલા ક્રાઈમ બ્રાંચની ટીમ રાજકોટ દોડી આવી હતી અને શહેર ક્રાઈમ બ્રાંચને સાથે રાખી પરસાણાનગર અને મવડી પ્લોટમાં દરોડા પાડી આ છેતરપીંડીમાં મદદગારી કરનાર ત્રણ શખ્સોને ઉઠાવી લીધા હતાં. આ ત્રણેયની પુછપરછ શરૂ કરવામાં આવી છે. પકડાયેલામાં એક સફાઈ કામદાર અને એક કોમ્પ્યુટર એન્જિનીયર હોવાનું જાણવા મળી રહ્યું છે. જેના એકાઉન્ટમાં 10 લાખ અને પાંચ લાખ જમા થયા હતાં. કેરાલા પોલીસે બે અલગ અલગ ગુનાની તપાસમાં આ કાર્યવાહી કરી છે.

કેરાલામાં થયેલા કરોડોના સાયબર ફ્રોડની તપાસ કેરાલા સાયબર ક્રાઈમ અને ક્રાઈમ બ્રાંચને સોંપવામાં આવી હોય આ અંગેની તપાસમાં ઓનલાઈન છેતરપીંડીમાં જે રકમ 10 લાખ અને પાંચ લાખ એકાઉન્ટમાં જમા થઈ હોય તે એકાઉન્ટ રાજકોટના હોવાની માહિતી મળતાં કેરાલા ક્રાઈમ બ્રાંચના પીઆઈ સહિતની ટીમ રાજકોટ આવી હતી અને રાજકોટમાં ક્રાઈમ બ્રાંચના અધિકારીને મળી મદદ માંગી હતી. શહેર ક્રાઈમ બ્રાંચની ટીમને સાથે રાખી કેરાલા પોલીસે મવડી પ્લોટ અને પરસાણાનગરમાં દરોડા પાડયા હતાં. જેમાં સફાઈ કામદાર તરીકે નોકરી કરતાં સચિન જેઠવા તેમજ તેની સાથે ઉર્વેશ જેઠવા અને કોમ્પ્યુટર રીપેરીંગનું કામ કરતાં ગૌરાંગ વૈષ્ણવની પુછપરછ કરી હતી. જેમાં સચિન અને ઉર્વેશની પુછપરછમાં કૃતાર્થ સુચકનું નામ ખુલ્યું હતું. જ્યારે ગૌરાંગની પુછપરછમાં અમદાવાદના એક સી.એ. નિકુંજનું નામ બહાર આવ્યું છે. કેરાલા સાયબર ક્રાઈમની પુછપરછમાં આ બન્ને છેતરપીંડીમાં 10 લાખ અને પાંચ લાખની રકમ એકાઉન્ટમાં જમા થયાનું જાણવા મળ્યું હોય જેના આધારે કાર્યવાહી કરવામાં આવી છે.

અત્રે એ વાત ઉલ્લેખનીય છે કે થોડા દિવસ પૂર્વે જ કેરાલામાં નોંધાયેલા 7.65 કરોડના સાયબર ફ્રોડમાં ગુજરાતથી તાઈવાનના બે નાગરિકોને કેરાલા પોલીસે ઉઠાવી લીધી હતાં. કેરળના અલપ્પુઝા જિલ્લાના ચેરથાલાના ડોકટર દંપતિને ઓનલાઈન ટ્રેડીંગમાં મોટો નફો મળશે તેવી લાલચ આપી 7.65 કરોડની છેતરપીંડી કરવામાં આવી હતી. જેની તપાસમાં કેરાલા પોલીસને ગુજરાતનું કનેકશન ખુલ્યું હતું અને ગુજરાતમાં રહેતાં તાઈવાનના પિંગઝેનના તાઓયુઆનના 35 વર્ષિય શેન વેઈ હાવ અને 26 વર્ષિય વાંગ ચુન વેઈની ધરપકડ કરી હતી. આ કેસમાં પણ કેરેલા સાયબર ક્રાઈમે મલયાલીમાંથી પાંચ લોકોને ઉઠાવી લેતાં તાઈવાનનું કનેકશન ખુલ્યું હતું. કેરેલામાં થયેલા સાયબર ફ્રોડમાં બીજી વખત ગુજરાત અને રાજકોટનું કનેકશન બહાર આવ્યું છે. જેના આધારે કેરેલા પોલીસે રાજકોટ ક્રાઈમ બ્રાંચને સાથે રાખી દરોડા પાડયા હતાં.

150 ફૂટ રીંગ રોડ પરના કાફેમાં મળતા શખ્સે સીસામાં ઉતાર્યા
કેરેલા પોલીસની પુછપરછમાં કેટલાક ચોંકાવનારી વિગતો સામે આવી હતી. સફાઈ કામદાર સચિન અને ઉર્વેશની પુછપરછમાં જાણવા મળ્યું કે 150 ફુટ રોડ પર આવેલા બુલ્સ કાફેમાં કૃતાર્થ સુચક સાથે તેની ઓળખાણ થઈ હતી. તે કાફેમાં આવતો હોય જેથી સચિન સાથે પરિચય થયા બાદ તેણે પોતાના બેંક એકાઉન્ટમાં ટેકનીકલ કારણોસર એકાઉન્ટ ઓપરેટ થઈ શકતું ન હોય સચિનનું એકાઉન્ટ ઉપયોગ કરવા માટે વાત કરી હતી અને તેમાં રૂપિયા જમા થાય તે ચેક દ્વારા ઉપાડી લેશે તેમ કહી અગાઉથી કોરો ચેક માગ્યો હતો જો કે સચિનના એકાઉન્ટમાં ચેક બુક નહીં હોવાથી તેણે મિત્ર ઉર્વેશ જેઠવાને વાત કરી હતી અને ઉર્વેશના એકાઉન્ટમાં 9 લાખની રકમ જમા થઈ હતી. બીજા કેસમાં કોમ્પ્યુટર રીપેરીંગનું કામ કરતાં ગૌરાંગ વૈષ્ણવને અમદાવાદના સી.એ.તરીકે વ્યવસાય કરતાં નિકુંજનો પરિચય થયો હોય નિકુંજે એકાઉન્ટ ઉપયોગ કરવા માટે પૈસાની ઓફર કરી હતી અને તેને આ એકાઉન્ટમાં રૂપિયા જમા કરાવ્યા બાદ ઉપાડી લીધા હોય આ બન્ને કેસમાં ઓનલાઈન સાયબર ફ્રોડની રકમ જમા થઈ હોય જેથી કેરેલા પોલીસે આ ત્રણેયની પુછપરછ કરી હતી.