ઉના તાલુકાના વાંસોજ ગામે નિદ્રાધીન વૃદ્ધની ક્રૂર હત્યા

ઘરની ઓસરીમાં સૂતેલા વૃદ્ધને તીક્ષ્ણ હથિયારના ઘા ઝીંકાયા

ઉના તાલુકાના વાંસોજ ગામે નિદ્રાધીન વૃધ્ધની તેના ઘરની ઓસરીમાં તિક્ષ્ણ હથિયારના ઘા ઝીકી હત્યા કરવામાં આવતા સતસનાટી મચી ગઇ છે. આ મામલે મૃતકના પુત્રની ફરિયાદને આધારે પોલીસે ગુનો નોંધી હત્યારાની શોધખોળ શરૂ કરી છે.

વાંસોજ ગામે રહેતા મસરીભાઈ ઉર્ફે ઘેલાભાઈ શિયાળ પોતાના ઘરની ઓસરીમાં સુતા હતા. ત્યારે કોઈ અજાણ્યા શખ્સો એ અંદર પ્રવેશ કરી વૃદ્ધ મસરીભાઈ ઉપર તિક્ષ્ણ હથિયાર વડે માથાનાં ભાગે ઘા મારી મોત નીપજાવેલ હતુ. અને આ ઘટનાની જાણ થતા લોકોનાં ટોળે ટોળા એકઠા થઇ ગયા હતા. મૃતક વૃદ્ધને માથાનાં ભાગે હથિયાર વડે ઘા મારી મોતને ઘાટ ઉતારતાં લોહીલોહાણ હાલતમાં ઢળી પડેલ હતાં. જે અંગેની જાણ પોલીસને થતા નાવાબંદર મરીન પોલીસ, એલ સી બી બ્રાન્ચ સહિત કાફલો ઘટના સ્થળે પહોંચી ગયો હતો. અને હત્યા કરનારની શોધખોળ હાથ ધરી છે. વૃદ્ધના મૃતદેહને પીએમ અર્થ ઉના સરકારી હોસ્પિટલે ખસેડવામાં આવેલ આ અંગે વૃદ્ધના દીકરા રણછોડભાઇ મસરીભાઇ શિયાળ એ નવાબંદર મરીન પોલીસ સ્ટેશનમાં અજાણ્યા શખ્સો વિરુદ્ધ ફરીયાદ નોંધાવી હતી. પોલીસે 103(1) સહિત ગુન્હા હેઠળ ફરીયાદ નોંધી આગળની વધુ તપાસ હાથ ધરી છે.