મોરબીમાં ઇ-કેવાયસીના નામે ધુનડા ગામના યુવાન સાથે 12.50 લાખની ઠગાઇ

સાયબર ગઠિયાઓ અવનવી તરકીબ અજમાવી લોકોને છેતરી રહ્યા છે ત્યારે મોરબીમાં અગાઉ બે લોકો સાથે આરટીઓના મેમોના નામે એપીકે ફાઈલ મોકલી મોટી રકમની છેતરપિંડી થયા બાદ ગઈકાલે ઘુનડા ગામના યુવાન સાથે બેંકનું ઈ-કેવાયસી કરવાના નામે એપીકે ફાઈલ મોકલી રૂૂપિયા 12.50 લાખની છેતરપિંડી કરવા અંગે સાયબર ક્રાઈમ પોલીસ મથકમાં ફરિયાદ નોંધાઇ છે.

પ્રાપ્ત વિગતો મુજબ મોરબીના ઘુનડા ગામે રહેતા નીતિનભાઈ ઠાકરસીભાઈ કોટડીયાએ બે અજાણ્યા મોબાઈલ ધારકો વિરુદ્ધ ફરિયાદ નોંધાવતા જાહેર કર્યું હતું કે, ગત તા.6 એપ્રિલથી 8 એપ્રિલ 2025 દરમિયાન આરોપીઓએ ફોનમાં ખોટા મેસેજ કરી ઈન્ડ્સઇન્ડ બેંકના ઈ કેવાયસી કરવા માટેની એપીકે ફાઈલ મોકલી હતી. જે ફાઈલ વોટ્સએપમાં ખોલતાની સાથે જ આરોપીઓએ ફરિયાદીની જાણ બહાર બેન્ક એકાઉન્ટમાંથી રૂૂપિયા 12.50 લાખ બારોબાર ઉપાડી છેતરપિંડી કરી હતી. બનાવ અંગે સાયબર ક્રાઈમ પોલીસે મોબાઈલ નંબરના આધારે બે અજાણ્યા ઈસમો તેમજ તપાસમાં ખુલે તે તમામ વિરુદ્ધ ગુન્હો દાખલ કરી તપાસ શરૂૂ કરી છે.