જનેતા બની કઠોર કાળજાની!! પતિનું દેણું ચૂકવવા એક માંએ પોતાના 30 દિવસના માસુમ બાળકને 1.5 લાખમાં વેચ્યું

કર્ણાટકના રામનગરમાંથી એક ચોંકાવનારો કિસ્સો સામે આવ્યો છે, જ્યાં એક મહિલાએ તેના પતિનું દેવું ચૂકવવા માટે પોતાનું બાળક વેચી દીધું. આ મામલો ત્યારે સામે આવ્યો જ્યારે મહિલાના પતિએ પોલીસમાં તેનો પુત્ર ગુમ હોવાની ફરિયાદ નોંધાવી. પતિએ પત્ની પર શંકા વ્યક્ત કરી હતી, જે બાદ પોલીસે તપાસ શરૂ કરી હતી. મહિલાએ તેના 30 દિવસના નવજાત બાળકને 1.5 લાખ રૂપિયામાં વેચી નાખ્યું. હાલ પોલીસે મહિલાની ધરપકડ કરી છે. મહિલાના બે સહયોગીઓ અને ખરીદનારની પણ ધરપકડ કરવામાં આવી છે.

બાળકને બચાવીને માંડ્યાના બાળ કલ્યાણ ગૃહમાં મોકલવામાં આવ્યો છે. મહિલાના પતિએ 7 ડિસેમ્બર, 2024ના રોજ પોલીસમાં ફરિયાદ નોંધાવી હતી કે તેનો નવજાત પુત્ર ઘરેથી ગુમ થયો હતો અને તેને તેની પત્નીની મિલીભગતથી કંઈક ખોટું થયું હોવાની શંકા હતી. પતિ-પત્ની બંને મજૂરી કરે છે અને તેમને પાંચ બાળકો છે. ઓછી આવકના કારણે દંપતીને ઘર ચલાવવામાં મુશ્કેલી પડી રહી હતી.

ટાઈમ્સ ઓફ ઈન્ડિયાના અહેવાલ મુજબ, પિતાએ પોલીસને જણાવ્યું કે, "મારા પર 3 લાખ રૂપિયાથી વધુની લોન છે અને મારી પત્નીએ થોડા દિવસો પહેલા મને સૂચન કર્યું હતું કે લોનની ચુકવણી કરવા માટે અમે અમારા નવજાત બાળકને એક નિઃસંતાન દંપતીને વેચી દઈએ, પરંતુ મેં સ્પષ્ટ ના પાડી દીધી અને કહ્યું કે તેણે આવું ક્યારેય ન વિચારવું જોઈએ."

નવજાત શિશુના પિતાએ પોલીસને જણાવ્યું હતું કે, "5 ડિસેમ્બરની સાંજે હું કામ પરથી ઘરે પાછો આવ્યો અને જોયું કે મારો પુત્ર ગુમ હતો. જ્યારે મેં પૂછપરછ કરી તો મારી પત્નીએ મને કહ્યું કે તેને સ્વાસ્થ્ય સંબંધી કેટલીક સમસ્યાઓ હતી અને તેણે તેને એક સંબંધી પાસે રાખ્યો હતો. આ વાત માનીને હું કામ પર ગયો અને રાત્રે પાછો આવ્યો, પરંતુ મારી પત્નીએ તે જ વાતનું પુનરાવર્તન કર્યું, પરંતુ આ વખતે મને શંકા હતી.

ફરિયાદીએ જણાવ્યું હતું કે, "જ્યારે મને શંકા થઈ, ત્યારે મેં મારી પત્નીને ડૉક્ટર અથવા સંબંધીનો નંબર માંગ્યો કે જેનોની પાસે મારો પુત્ર હતો, પરંતુ તેણીએ ના પાડી. જેના કારણે અમારી વચ્ચે ઝપાઝપી થઈ." ફરિયાદ બાદ મહિલા પોલીસ બાળકની માતાને મળવા ગઈ હતી. રિપોર્ટ અનુસાર, એક તપાસ અધિકારીએ કહ્યું, "આરોપીઓએ બાળક તેના સંબંધી પાસે હોવાનું કહીને ગેરમાર્ગે દોરવાનો પ્રયાસ કર્યો હતો." જો કે, આ પછી મહિલાએ કબૂલાત કરી હતી કે તેણે તેનું બાળક બેંગલુરુની એક મહિલાને 1.5 લાખ રૂપિયામાં વેચ્યું હતું.