3 દિવસ પૂર્વે પુત્રવધૂએ ચામાં ઘેની ટીકડાં પીવડાવ્યાનું નાટક કરનાર પ્રૌઢે ફરી ટીકડા ખાધા

શહેરના મિલપરામાં રહેતા વૃધ્ધ ત્રણ દિવસ પૂર્વે પુત્રવધૂએ ચા મા ઘેની ટીકડા પીવડાવી દીધાનું નાટક કરી સિવિલમાં દાખલ થયા હતાં. જેઓએ આજે ફરીથી ભુલથી ઘેનના ટીકડા પી ગયાનું જણાવી સિવિલમાં દાખલ થતાં પોલીસે તપાસ હાથ ધરી છે.

જાણવા મળતી વિગત મુજબ, મિલપરા શેરી નં.7/18માં રહેતા સાબુમલ પાલુમલ તલવાણી (ઉ.68) નામના વૃધ્ધ ગઈ રાત્રે અઢી વાગ્યાના અરસામાં પોતાના ઘરે ભૂલથી ઘેનના ટીકડા પી જતાં તેઓ સિવિલ હોસ્પિટલમાં દાખલ થયા હતાં. આ અંગે સિવિલ ચોકીના સ્ટાફે પ્રાથમિક નોંધ કરી ભક્તિનગર પોલીસને જાણ કરી હતી. ઉલ્લેખનીય છે કે, ઉપરોકત વૃધ્ધ ત્રણ દિવસ પહેલા પણ સિવિલ હોસ્પિટલમાં દાખલ થયા હતાં. ત્યારે તેમણે સિવિલ ચોકીના સ્ટાફ સમક્ષ એવી નોંધ કરાવી હતી કે તેઓને તેમના પુત્રવધુએ ચા મા ઘેનના ટીકડા નાખી પીવડાવી દીધા છે. જો કે ભકિતનગર પોલીસ પહોંચે તે પહેલા જ હોસ્પિટલમાંથી નાસી છુટયા હતાં ત્યારે ફરી દાખલ થતાં વૃધ્ધ નાટક કરતાં હોવાનું જાણવા મળ્યું હતું.