કચ્છમાંથી શંકાસ્પદ સરકારી ખાતર ભરેલ ટ્રક ઝડપાઇ

બિલ અને આધાર- પુરાવા વગરની ઇફ્કો ડીએપીની 231 થેલીઓ સાથે રૂા.26.88 લાખનો મુદ્દામાલ જપ્ત

ભચાઉ તાલુકાના આધોઇ પાટિયા પાસે સરહદી રેન્જ સાયબર ક્રાઇમ પોલીસ મથકની ટીમે ઇફ્કો કંપનીના સરકારી ડીએપીે ખાતરના રૂૂ.6.88 લાખના બીલ વગરના શંકાસ્પદ જથ્થા સાથે એકને પકડી લેતાં ગોલમાલ કરતા તત્વોમાં ફફડાટ મચી જવા પામ્યો છે.

સરહદી રેન્જ સાયબર ક્રાઇમ પોલીસ મથકના પીઆઇ એલ.પી.બોડાણાએ વિગતો આપતાં જણાવ્યું હતું કે, ટીમ પુર્વ કચ્છ વિસ્તારમાં પેટ્રોલિંગ કરી રહી હતી. તે દરમિયાન પીએસઆઇ વાય.કે.ગોહિલને મળેલી બાતમીના આધારે સામખિયાળી રાધનપુર હાઇવે પર આધોઇ પાટીયા પાસે આવેલી ભારત હોટલ પર ઉભેલી ટ્રકની તલાશી લેતાં તેમાં ભરેલો પ્રધાનમંત્રી ભારતીય જન ઉર્વરક પરિયોજના ભારત ડીએપી ઇફ્કો કંપની લખેલા સરકારી ખાતરના બાચકાના બીલ અને આધાર પુરાવા માગતાં તે ત્યાં હાજર મુળ પાટણના વાહીદપુરાના ધોનાભાઇ વશરામભાઇ ભરવાડ પાસે ન હોઇ ટ્રકમાં ભરેલો રૂ.6,88,842 ની કીંમતના ઇફ્કો કંપનીના સરકારી ડીએપી ખાતરની 231 બોરીઓ સાથે ધોનાભાઇની અટક કરી ટ્રક સહિત 26,88,842 નો મુદ્દામાલ જપ્ત કર્યો હતો અને વધુ કાર્યવાહી માટે લાકડિયા પોલીસને સોંપ્યો હતો. અત્રે ઉલ્લેખનિય છે કે , ઇફ્કો લખેલા ખાતરીની બોરીઓ સગેવગે થતી હોવાની ફરિયાદો ઉઠતી હોય છે તો ભુતકાળમાં પોલીસે ષડયંત્રનો પર્દાફાશ પણ કર્યો હતો. હવે સરહદી રેન્જી કાર્યવાહીથી આવા તત્વોમાં ફફડાટ મચી જવા પામ્યો છે.